एक साताअघि काका काकिले ‘यौटा स्वास्नी पाउन नसकेको थारो’ भनेर गालिगलौज गरेको घटनाले माण्डवी गाउँपालिका २ मर्कावाङ्ग रातापानीका पंकज परियारको मन घोँचिरहेको थियो। त्यसअघिपनि पटक पटक ‘थारो’ भनेको सहिरहेका उनले त्यसदिन भने अब ‘वारपार’ गर्ने भन्दै ‘ईगो’ राखे।

‘ईगो’को बदला लिन शुक्रबार पंकज परियार काकाको घरमा झ्यालबाट छिरे। ज्याला मजदुरी गर्ने काका सुतेको नजिकै उनले प्रयोग गर्ने गैंटी, बेल्चा, सावेल लगायतका हतियार थिए। ‘थारो’ भनेको रिसको बदला लिन त्यहाँ पुगेका उनले घन उठाए र काका राम बहादुर परियार (६० वर्ष) को टाउकोमा हिर्काए। एकपटक हिर्काउँदा चलबलाएपछि उनले अरु २ चोट काकाको टाउकोमै हिर्काए।

काका चलबलाउन छोडेपछि छेउँमै रहेकि काकि हुकुमा परियार (५६ वर्ष)को टाउकोमा ३ चोट घनले हिर्काए। दुबै जनाको मृत्यु भएपछि त्यहाँबाट निस्केका उनी ५० मिटर टाढा पुगेर हत्या गरेको घन फ्याँके।

अर्कोदिन दिउसोसम्म घरका कोहि नउठेपछि उनै पंकजले प्रहरीलाई घटनाबारे खवर गरेका थिए। आफूभित्र रहेको ‘ईगो’को बदला लिन दुबै जनाको हत्या गरेका पंकजले प्रहरीबाट बँच्नकै लागि सुरुमै खवर गरेका थिए। अभियुक्त ३४ वर्षिय उनी मृतक राम बहादुर परियारका सहोदर दाईका छोरा हुन्।

पंकजको श्रीमतिले केही समयअघि उनलाई छोडेकी थिईन। श्रीमतीले छोडेका उनलाई काका-काकीले पटक-पटक ‘थारो’ भनेर गालिगलौज गर्ने गर्थे। त्यहि गालिगलौजबाट जागेको ‘ईगो’को बदला लिन उनले १ हप्ताअघि काका काकीको हत्या गर्ने योजना बनाएका थिए।

शनिबार दिउँसो बीभत्स हत्या गरिएको श्रीमान श्रीमतीको शव फेला परेपछि प्यूठान प्रहरीले ‘अपरेशन माण्डवी’ सञ्चालन गरेको थियो। अनुसन्धानबाट काका-काकीले ‘थारो भनेको ईगो’ साधेका अभियुक्तले मदिरा सेवन गरेपछि हत्या गरेको निष्कर्षमा पुगिएको जिल्ला प्रहरी कार्यालय प्यूठानका प्रमुख दिपेश बस्यालले बताए।

आईतबार प्रहरीले पत्रकार भेटघाट मार्फत अभियुक्तलाई सार्वजनिक गरेको छ।