प्यूठान आङ खस्ने महिलाका लागी निशुल्क शल्यक्रिया सिविर संचालन हुने भएको छ । शुक्रवार स्वास्थ्य कार्यालय प्यूठानले जिल्लाका सरोकारवालाको बैठकमा सिविर संचालन हुने जानकारी गराएको छ ।

जेठ १५ गते देखी २१ गते सम्म सञ्चालन हुने सिविरमा शल्यक्रिया गर्नका लागि अहिलेसम्म जिल्लाभरबाट १ सय ४९ जना आङ खस्ने समस्या भएका महिलाको पहिचान गरिएको स्वास्थ्य कार्यालय प्यूठानका कोल्डचेन निरिक्षक कौसल राज वैद्यले जानकारी गराए । स्थानीय स्वाथ्यकर्मीबाट पहिचान भएका उनिहरुको जेठ १३ गते स्कृनिङ गरिने र १५ गतेदेखि शल्यक्रिया सिविर सन्चालन गरिने कार्यालयले जनाएको छ ।

कोहलपुर मेडिकल कलेको प्राविधिक सहयोगमा स्वास्थ्य निर्देशनालय लुम्वीनी प्रदेशले शिविरको आयोजनामा गरेको हो । आङ खस्ने समस्याको लक्षण भएका महिलाहरुले नजिकैको स्वास्थ्य सस्थामा पुगेर परामर्श लिई सेवा लिन सक्ने स्वास्थ्य कार्यालय प्यूठानले जनाएको छ ।

शिविरमा जिल्लाका ९ वटै स्थानिय तहहरुले आफ्नो स्थानीय तहका विरामीहरुलाइ अस्पतालसम्म लग्ने र ल्याउने निशुल्क व्यावस्था मिलाउने प्रतिबद्दता जनाएका छन् ।

नेपालमा ६ लाख भन्दा बढी महिलालाई आङ खस्ने समस्या देखीएको स्वास्थ्य निर्देशनालयका स्वास्थ्य प्रशासक डाक्टर अच्यूत शर्माले बताए । उनले बच्चा जन्मेपछि प्राय महिलाहरुमा आङ खस्ने समस्या देखीएको बताए । गत बर्ष प्यूठानका ३९ जना महिलाको रोल्पा लगेर शल्यक्रिया गरिएको थियो ।