नौबहिनी गाउँपालिकाका ग्रामिण सडकहरु कालोपत्रे हुन थालेका छन् । मुख्यत पालिका केन्द्र नौबहिनी गाउँपालिका –६ बाहानेदेखि वडा केन्द्र पुग्ने सडक कालोपत्रे गर्ने काम अघि बढेको छ । गाउँपुग्ने सडक कालोपत्रे भएपछि यहाँका स्थानीयको जीवनशैली फेरिँदै छ । नौबहिनीको मुख्य व्यापारीक केन्द्र बाहानेबाट उपभोग्य सामान बोकेर गाउँतर्फ लर्को लाग्नेहरु हिजोआज बाहानेमा भेटिदैनन् । दुई दशक अघिसम्म यहाँका स्थानीयले बहानेदेखि नुन, तेल, चामल बोकेर दैनिकी चलाउँथे । हिजोआज गाडीमा हुईकिन्छन्।
पछिल्लो आ.व. २०७९–०८० देखि यहाँका सडक पक्की गर्ने कार्य थालिएको छ । बाहाने बजारमा आरसीसी ढलान गरिएको छ । बाहानेदेखि नौबहिनी –५ डाम्रृ, नौबहिनी –२ लिघा पुग्ने सडक क्रमश कालोपत्रे गर्ने कार्य अघि बढाइएको छ। वडा नम्बर –६ लुङ ठूलोगाउँ, ७ स्थित बल्ले–मैरामारे सडक कालोपत्रे गर्ने कार्य अघि बढेको छ । खबाङ हुँँदै स्याउलीबाङ पुग्ने सडकले गति लिँदै छ । २०६४–०६५ सालदेखि क्रमिकरुपमा जिविस, गाविस र चन्दा समेत गरी यहाँबाट ग्रामीण सडक विस्तार हुन थालेका हुन् । गरिबी निवारण कोष मार्फत पनि सडक खन्ने कार्य भएको थियो । पालिकाभित्र ट्रयाकओपन गर्ने काम लगभग सकिएका छन् । सडक स्तरोन्नति गर्ने कार्य तिव्र गतिमा अगाडि बढेका छन् । २०७४ सालको पहिलो स्थानीय तहको निर्वाचन पछि गाउँ÷गाउँमा सडक ट्रयाकओपनको कार्य अघि बढेको थियो। २०७९ को दोस्रो निर्वाचनपछि आएका जनप्रतिनिधिहरुले बाहानेदेखि वडा केन्द्रसम्मको सडक कालोपत्रे गर्ने योजना अघि सारे। यसपछि गाउँ पुग्ने सडक कालोपत्रे गर्ने योजना अघि बढेको प्रमुख प्रशासकीय अधिकृत शिवराज पौडेलले बताए ।

२०७९–०८० मा पक्की सडकको अवधारणासहित बहाने बजारको सडकले मुहार फेर्यो । यहाँ १ करोड लागतमा ५ सय ७२ मिटर पक्की नाला सहितको सडक ढलान भएको छ । २०८०–०८१ मा बहाने–लिघा सडक ६० लाखको लगानीमा ३ सय ७५ मिटर बन्यो । बहाने –लुङ्ग ५० लाखको लागतमा ३ सय ७० मिटर पक्की नाला सहितको कालोपत्रे भएको छ । संघीय समपुरक अन्तर्गत बहाने– डाम्री–सिर्प २ करोड ७६ लाख ९२ हजार ५ सय ३६ रुपैयाँमा ठेक्का मार्फत २ किलोमिटर कालोपत्रे गरेर अन्य काम हुँदै छ ।
प्रदेश समपुरक अन्तर्गत बहाने –लुङ्ग तुषारा सडक ४८ लाख ४५ हजार ४ सय ६२ रुपैयाँ खर्च गर्नेगरी ४ सय ९५ मिटर सडक पक्की नाला सहित कालोपत्रेको काम भैरहेको छ । बल्ले –मैरामारे –रोल्पा सडकमा ५१ लाख ३१ हजार ५ सय ९७ रुपैयाँमा ५० मिटर आरसिसी ढलान सहित ३ सय मिटर पक्की नाला सहितको कालोपत्रे सप्पन्न भैसकेको गाउँपालिकाले जनाएको छ । सडक विस्तारले अहिले गाउँघरका कुना–कुनामा उत्पादन भएका आलु, मकै लगायत कृषिउपजहरु सहरका बजारमा पुग्न थालेका छन् । उत्पादनलाई प्रत्यक्ष सडक सञ्जालसँग जोड्न र बजारीकरण गर्न पालिकाले थप योजना तथा कार्यक्रमहरु ल्याउने गाउँपालिका अध्यक्ष दिल बहादुर थापाले बताए । सडक विस्तार तथा पक्की सडकको अवधारणा पूरा गर्न निर्माण व्यवसायीहरुको सहयोग मिलेको उनले बताए । ठेक्का मार्फत निर्माण थालिएका सडकहरु समयमै काम सम्पन्न भएकोमा खुसी व्यक्त गरे ।