प्यूठान नगरपालिका ८ स्थित कक्षपति ट्रेडर्स देखि जनता माध्यामिक विद्यालय जाने सडक जहिल्यै हिलाम्य थियो । गुदगुदे हिलोले सडक छोपेको विषय सम्बन्धी झुलेनी पोष्ट साप्ताहिक वर्ष ८ अंक १४ कार्तिक २ गते बाटो हो कि कुलो ? चिन्नै गाह्रो शिर्षकमा हाम्रो नजरमा प्रकाशित गरीएको थियो ।
समाचार प्रकाशन पछि प्यूठान नगरपालिकाले यस सडकमा २० ट्रिप ढुङ्गा, गिट्टि तथा बालुवा राखेको छ । नगरपालिकाको जेसिभि लगाएर यहाँ सम्माइएको छ । यहाँ बाटो सम्माइएपछि स्थानीय खुसी भएका छन् ।
बाटोबाट कुलो बग्नाले हिलाम्य सडकमा पैदल हिँड्ने यात्रुहरुलाई हिड्न कठिन थियो । जिम्मेवार निकायदेखि राजनीतिक पहुँच राख्नेहरु यहाँ हुँदापनि सडक मर्मतमा कसैले ध्यान दिएका थिएनन् । गाडीले हिलो र पानी उछिट्याएर ब्यवसायी र विद्यार्थीहरुलाई समस्या थियो ।
नजिकै जनता माध्यामिक विद्यालय र झिमरुक क्याम्पस समेत रहेकाले विद्यार्थीहरुलाई कठिन थियो । यहाँ बाटो मर्मत भएपछि आवतजावतमा सहज भएको छ । अहिले मर्मत भएपनि दिगो व्यवस्थापनका लागि कुलो र नालीको निर्माणमा नगरपालिका लगायत सरोकार वाला निकायले ध्यान दिन जरुरी छ ।
