प्युठान नगरपालिकाले शुक्रबार सार्वजनिक सुनुवाइ कार्यक्रम सम्पन्न गरेको छ । आ.व. २०७८÷०७९ को प्रगति विवरण सार्वजनिक गर्नुका साथै सेवाग्राही र नगरवासिसंग दोहोरो संवाद गर्ने उदेश्यले सार्वजनिक सुनुवाई सम्पन्न गरीएको हो ।

नेपाल पत्रकार महासंघ जिल्ला शाखा प्यूठानले सहजीकरण गरेको कार्यक्रममा प्रमुख प्रशासकिय अधीकृत महेश कुमार गुरुङ्गले प्रगति प्रतिवेदन पेश गरेका थिए । सहजिकरणको क्रममा संकलन गरिएका नागरिक प्रतिवेदन र वहिर्गमन प्रतिवेदन महासंघका कोषाध्यक्ष प्रज्वल पहाडीले गरेका थिए ।

सार्वजनिक सुनुवाइका क्रममा प्यूठान नगरपालिकाका नागरिकले फोहोरमैला व्यवस्थापन गर्नुपर्ने, बाग्दुलामा रहेको तरकारी तथा फलफुल संकलन केन्द्र संचालनमा किन आएन ? नागरिक सहायता कक्ष (हेल्प डेस्क) सुचारु गर्नुपर्ने, योजनाका सार्वजनिक सुनुवाइ किन हुन्न ? सार्वजनिक सुचना बोर्ड फोटो खिच्नको लागि मात्र राखिन्छ, यसको जवाफदेही हुने निकाय कुन हो ? २० युनिट सम्म विद्युत महसुल २ महिना मात्र तिरेर किन रोकियो ? लगायतका प्रश्नहरु राखेका थिए ।

नागरिक प्रतिवेदन, वर्हिगमित प्रतिवेदन र सार्वजनिक सुनुवाईको क्रममा उठेका प्रश्न र गुनासोहरुको जवाफ पालैसंग नगरप्रमुख अर्जुनकुमार कक्षपती, प्रमुख प्रशासकीय अधिकृत महेश कुमार गुरुङ्ग, सम्बन्धित वडा अध्यक्षले दिएका थिए । प्रतिवेदन पेश गर्दै गुरुङ्गले हालसम्म ३३.४८ प्रतिशत बजेट खर्च भएको र ९० प्रतिशत योजनाहरु सम्झौता भएको बताएका छन् । सार्वजनिक सुनुवाइमा आएका प्रश्नको जवाफ दिदै कक्षपतिले गत वर्षको सो मुल्यांकनमा ६३ प्रतिशतबाट ७३ प्रतिशत पुगेर सफलता मिलेको र यो आ.व. मा योजनाका कामहरुको परिणाम राम्रो भएकाले यसपालि पनि जिल्लाको सबै स्थानीय तह मध्य उत्कृष्ट नगरपालिका हुने विश्वास लिएको बताएका छन् ।

सार्वजनिक सुनुवाइको क्रममा उठेका प्र्रश्न र गुनासोहरुलाई छनोट गरि पत्रकार महासंघले नगरपालिकालाई नागरिक सहायता कक्ष (हेल्प डेस्क) स्थापना गर्न, सार्वजसिनक स्थलहरुमा १ महिना भित्र सम्बन्धित पक्षसंग छलफल गरि फोहोरमैला व्यवस्थापन गर्न, प्रत्येक योजनाका सम्पुर्ण विवरण सहितको सुचना पाटी सम्बन्धित ठाउँ र काम सुरु हुनु अगावै राख्नको लागि नगरपालिकाले ध्यान दिन, प्रदेश स्तरीय आयोजनाका विषयमा नगरपालिकाको दायित्व र भुािमकाबारे प्रष्ट पार्न समेत ध्यानाकर्षण गराएको छ ।

नगरपालिका प्रमुख अर्जुन कुमार कक्षपतिको अध्यक्षतामा सुरु भएको कार्यक्रमको सञ्चालन पत्रकार महासंघका कोषाध्यक्ष प्रज्वल पहाडीले गरेका थिए ।