जिल्लाको माण्डवी गाउँपालिकाको नवनिर्मित प्रशासकीय भवन उद्घाटन गरिएको छ । सोमाबार लुम्बिनी प्रदेशका संस्थापक मुख्यमन्त्री तथा प्रदेश सभा सदस्य एवं नेकपा एमालेका केन्द्रिय महासचिव शंकर पोख्रेलले भवनको उद्घाटन गरेका हुन् ।

भवन निर्माणका लागि पालिकाले ५ करोड ८१ लाख बजेट विनियोजित गरेको थियो । आँशु पि.पि.जे.भि निर्माण सेवाले ठेक्का पाएको भवन १५ महिना भित्र सम्पन्न गरेको हो । बेठक, इजलास कक्ष सहित २१ वटा कोठा रहेका छन् । कार्यक्रममा पुर्व जनप्रतिनिधि, जग्गादाता, निर्माण व्यवसायी, सहिदका परिवार, उत्कृष्ट कृषक तथा पसुपालक, व्यवसायीहरुलाई सम्मान गरिएको थियो ।

कार्यक्रममा पालिका अध्यक्ष श्रीधर रोकाले आफुले अहिलेसम्म गरेको कामका विवरण प्रस्तुत गर्नुभएको गर्दै यो ५ वर्षमा पालिकाले उल्लेखनिय काम गरेको बताएका छन् । कार्यक्रममा बोल्दै प्रमुख अतिथि पोख्रेलले नवनिर्मित भवनले नागरिकहरुलार्ई थप सुविधा दिने विश्वास आफुले लिएकोे बताए । साथै देशमा अधिकारको राजनीति चलिरहेको भन्दै परिवर्तन ल्याउँन आर्थिक विकास र समृद्धिका लागि राजनीति गर्नुपर्ने बताएका छन् ।

लुम्बिनी प्रदेशका संस्थापक मुख्यमन्त्री तथा प्रदेश सभा सदस्य एवं नेकपा एमालेका केन्द्रिय महासचिव शंकर पोख्रेलको प्रमुख आतिथ्यतामा भएको कार्यक्रममा संघीय सांसद सुजिता शाक्य, प्रदेश सभा सदस्य हरि प्रसाद रिजाल लगायतका अतिथिहरुको उपस्थिति रहेको थियो ।
पालिका अध्यक्ष श्रीधर रोकाको अध्यक्षतामा भएको कार्यक्रमको सञ्चालन भने पालिकाका प्रमुख प्रशासकिय अधिकृत शिशिर रिजालले यरेका थिए ।