शिवालय दुग्ध सहकारी संस्था लि. खैरा संकलन केन्द्रबाट करिब १ वर्षको अवधिमा ४२ लाख भन्दा बढी रकमको दुध बिक्री भएको छ । सहकारीले स्थानीय स्तरमै किसानहरुले उत्पादन गरेका गाई, भैसीको दुध संकलनबाट २०७८ साउनदेखी ७९ साउन सम्ममा ४२ लाख ३१ हजार ६ सय ९४ रुपैयाको कारोवार भएको शिवालय दुग्ध सहकारी संस्था लिमिटेड खैराका अध्यक्ष विष्णु बहादुर बस्नेतले बताए ।

२०७८ साउनमा मध्य पहाडी लोकमार्ग दुग्ध विकास कार्यक्रमअन्तर्गत ५० प्रतिशत अनुदान र किसानहरुको ५० प्रतिशत लागतमा १ सय वटा गाई भैसी खरिद गरि संचालन गरिएको दुध उत्पादनबाट खैराका करिब ४३ जना किसानहरु लाभांवित हुने भएको अध्यक्ष वस्नेतको भनाई छ । सहकारी संस्था लिमिटेडले संकलन गर्दै आइरहेको दुध किसान डेरि जुर्मीले खरिद गर्दै आइरहेको उनले बताए ।

‘हाम्रो सहकारी संस्थाले किसानहरुबाट प्रतिलिटरमा ५ रुपैया राख्दै आएको छ,’ उनले भने । सहकारीले डेरीलाई अहिले प्रतिलिटर ७१ रुपैयाका दरले दुध बिक्री गर्दै आइरहेको छ । एकीकृत कृषि तथा पशुपंछी विकास कार्यालय प्यूठानले ५० प्रतिशत अनुदान स्वरुप दुध संकलन गर्ने मेसिन उपलब्ध गराएको वस्नेतले बताए । तर उक्त मेसिन हाल संचालन ल्याइएको छैन । उक्त मेसिनले विद्युत वढी खपत गर्ने भएको हुदाँ र प्राप्त मात्रामा दुध उत्पादन नभएकाले मेसिन प्रयोगमा नल्याएको वस्नेतले बताए ।

गाई, भैसीका लागि आवाश्यक आहार, घास, पराल दाना महंगो भएकाले किसानहरुले प्रशस्त मात्रामा दुध उत्पादन गर्न नसकिएको भन्दै किसानहरुले गुनासो गर्दै आइरहेको अध्यक्ष वस्नेतको भनाई छ ।

किसानहरुको समस्यालाई मध्यनजर गर्दै नगरपालिकाले आवाश्यक अनुदान उपलब्ध गराउने हो भने किसानहरुले राहत पाउने थिए ।