घनश्याम अस्तित्व
तिमी छ्यौ,
सताईरहन्छ्यौ बारम्बार बिभिन्न बहानामा
जस्तो कि,
धेरै सम्झिए पनि / नसम्झिए पनि
निद्रा बिगारिदिए पनि / नबिगारिदिए पनि
मुस्कुराए भने पनि / रिसाइदिए भने पनि
कोही नहुनु पनि के जिन्दगी हुनु !
अनुपस्थितिमा चोईटिनु जाति
उपस्थितिमा बरू पोलिनु जाति
बिभिन्न बहानामा सताईरहने / तड्पाइरहने
कोही नहुनु पनि के जिन्दगी हुनु !
अल्झिन्छु आफ्नै प्रश्नमा,
तिमी छ्यौ कि सियो छ यो हृदयमा ?
बस् बिझाइरहन्छ प्रेम – हृदयमा ।
अहो ! हृदयमा बिझाइरहने
कोही नहुनु पनि के जिन्दगी हुनु !
