पौरख गर्नको लागि धेरै टाढा जानु पर्दैन । घर वरिपरि आम्दानीका स्रोतहरु थुपै्र भेटिन्छन् । मल्लरानी गाउँपालिका ४ खलंगाकी ४१ वर्षीय सपना पोख्रेलले सबैलाई यो उदाहरण प्रस्तुत गरेकी छन् । उनको कुइनोभन्दा तल दुवै हात छैनन् । इच्छा शक्ति भएपछि शारिरिक रुपमा अशक्तताले केहि फरक नपार्ने उनी बताउछिन् ।

पोख्रेलले सपना च्याउ उद्योग नामक घरेलु उद्योग खोलेको ५ वर्ष भइसक्यो । उनी यसैमा रमाएकी छन् । उनले अरु सरह कमाई गरिहेकी छन् । शारिरीक अपांगता भएका व्यक्ति कमजोर छैनन् भन्ने यो बलियो उदारण बनेकी छन् । उनी जन्मजात शारिरिक रुपमा अशक्त महिला हुन् । जाडो समयमा ४५ दिनमा तयार हुने कन्य जातको च्याउले गर्मीको मौसममा महिना भित्रै उत्पादन दिने गर्दछ । यो बिक्री गरेर उनले दैनिक औसतमा १ हजार रुपैयाँ कमाउछिन् ।

नेपालगञ्ज तालिम केन्द्र खजुरा बाँकेबाट उनले च्याउ खेती सम्बन्धी १० दिने तालिम लिएपछि १० हजार लगानीमा च्याउ खेती सुरु गरेकी थिइन । च्याउ खेती सुरु गर्ने समयमा मल्लरानी गाउँपालिकाले सो खेती गर्नका लागि अनुदान स्वरुप एउटा टहरो निर्माण गरिदिएको बताइन् । यसका साथै सो तालिम केन्द्रले ३० हजार रुपैयाँ रकम अनुदान दिएको थियो ।

घरेलु तथा सानाउद्योग कार्यालय प्यूठानले १ लाख बराबरको पराल काट्ने मेसिन समेत अनुदान स्वरुप उपलब्ध गराएको पोख्रेलले बताइन । उनले एकीकृत कृषि तथा पशुपंक्षी विकास कार्यालयबाट समेत ८० हजार रुपैया रकम अनुदान पाइकी छन् । अनुदान पाएपछि उनमा उर्जा थपीएको छ । सपनाले च्याउको सीजनमा ६ महिनाको लागि १ जना कामदार समेत राख्ने गर्दछिन् । ‘हात गोडामा एलर्जी आउँछ ,’ उनले भनिन् ‘त्यसैले १ जनालाई दैनिक ५ सय ज्यालामा ६ महिनाको लागि पराल काट्न कामदार राख्ने गरेकी छु ।’ च्याउ खेतिमा मात्र होइन उनले महिला जागरण बहुउदेश्य सहकारी संस्था खलंगामा दैनिक बचत उठाउने जागिर समेत गर्दै आइरहेकी छिन । एसएलसीसम्म पढाई पूरा गरेकी उनले यो काम पनि राम्रोसंग सम्पादन गर्दै आएकी छन् ।