सामुदायिक विद्यालयहरुमा पठनपाठन सुधारहुँदै गएपछि संस्थागत विद्यालय छोडि सामुदायिक विद्यालयमा विद्यार्थी भर्ना हुनेक्रम बढेको छ । जिल्ला शिक्षा विकास तथा समन्वय ईकाई प्यूठानका अनुसार सामुदायिक विद्यालयमा अंग्रेजी माध्यमबाट समेत पढाई सुरु गर्न थालेपछि सामुदायिकमा सबैको चासो बढेको हो ।

शिक्षा विकास तथा समन्वय ईकाई प्यूठानका प्रमुख शिव पण्डितले संस्थागत विद्यालयमा विद्यार्थीको संख्या बढ्दै गएको बताए । संस्थागत वा बोर्डिङमा पढेका भन्दा पनि सामुदायिकमा नै पढेकाको नतिजा ११/१२ कक्षा पछि राम्रो आउने गरेको उनको भनाइ छ ।

पछिल्लो समय जनता मा.वि बाग्दुला, मुक्ती मा.वि रातामाटा, महेन्द्र मा.वि खलंगा, बालशिक्षा मा.वि ओखरकोट, माण्डवी मा.वि नयाँगाउँ लगायतका विद्यालयमा अग्रेंजी भाषाबाट समेत पढाई सुरुभएको छ ।

समन्वय इकाइको तथ्यांकअनुसार यस बर्ष कक्षा १–५ मा ३ हजार ३२, ६–८ मा ८ हजार एक सय ८५, ९–१० मा ४ हजार ४२ र ११–१२ मा २ हजार ६ सय ४२ गरि जिल्लामा १७ हजार ९ सय १ विद्यार्थी भर्ना भएका छन् । जिल्लामा ३ सय ९७ सामुदायिक, ४७ संस्थागत र ३ धार्मिक प्रकृतीका विद्यालय छन् ।