२०८० असोज २३गर्भवती महिलाहरुका लागि प्रयोगशाला परिक्षण स्वास्थ्य शिविर सुरु गरिएको छ । मंगलबार नौबहिनी गाउँपालिका ५ डामृको स्वास्थ्य चौकीमा गर्भवती महिलाहरुको लागि प्रयोगशाला परिक्षण स्वास्थ्य शिविर सञ्चालन गरिएको वडा अध्यक्ष दलराज पुन मगरले जानकारी दिए । उनका अनुसार घरमा हुने सुत्केरीहरुलाई शुन्य बनाउन र स्वास्थ्यलाई गुणस्तरी एवं भरपर्दो बनाउन यो अभियान चलाइएको हो ।
स्वास्थ्य चौकीमा रगतको समुह पहिचान गरि रगत संकलन गर्ने र आवश्यकता अनुसार गर्भवती महिलाहरुले प्रयोग गर्न सकिने गरि कार्य अघि बढाइएको पनि अध्यक्ष पुन मगरले जानकारी दिए । साथै विश्व मानसिक स्वास्थ्य दिवसको अवसरमा मानसिक स्वास्थ्य सम्बन्धी अभिमुखिकरण कार्यक्रम समेत गरिएको थियो । कार्यक्रममा जिल्ला अस्पताल प्यूठानका मानसिक रोग विशेषज्ञ डा. पंकज पाठकले मानसिक रोग बारे जानकारी तथा सामान्य चेकजाँच समेत गरेका हुन् ।
वडा अध्यक्ष दलराज पुन मगरको अध्यक्षतामा सुरु भएको कार्यक्रममा प्रमुख अतिथि नौबहिनी गाउँपालिका अध्यक्ष डिल बहादुर थापा रहेका थिए । नौबहिनी गाउँपालिकाको आयोजना तथा नौबहिनी गाउँपालिका ५ डामृको समन्वयमा गरिएको कार्यक्रमको सञ्चालन नौबहिनी स्वास्थ्य शाखा प्रमुख ऋषिराम शर्माले गरेका थिए ।
