लुम्बिनी प्रदेशका सभामुख तुलाराम घर्तीले स्थानीय तह प्रदेश सरकारको संघियताको आधार भएको बताएका छन् । बुधबार लुम्बिनी प्रदेश सभा सचिवालय राप्ती उपत्यका दाङको आयोजनामा प्यूठानमा भएको लुम्बिनी प्रदेश सभा र स्थानीय तहविच कानुन निर्माण तथा सभा सञ्चालन सम्बन्धी पत्रकार भेटघाट कार्यक्रममा प्रदेश सभामुख घर्तीले यस्तो बताएका हुन् ।

स्थानीय तहका सरकार ५ बर्ष सम्म नै टिक्ने भएकाले आम जनताको समस्यासँग जुधेर काम गर्ने बताउँदै ३ तह मध्ये स्थानीय तह सबैभन्दा महत्वपुर्ण भएको बताए । साथै सभामुख घर्तीले जिल्लाका सबै स्थानीय तहका प्रमुखहरुसँग कानुन निर्माणको बारेमा गहन छलफल गर्दा कानुन निर्माणमा प्रमुखहरुले दक्ष जनशक्तिको अभाव रहेको बताएको जानकारी गराए । ऐन कानुन निर्माण गर्दा जनताको विश्वासबाट बनाए जनता र स्थानीय तहबिच सुमधुर सम्बन्ध रहने उनको भनाई थियो । स्थानीय तह सुशासन हुनको लागि पारदर्शिता र जवाफदेहिता हुन पनि आवश्यक रहेको सभामुख घर्तीले बताए ।

कार्यक्रममा लुम्बिनी प्रदेशका सांसद तुल्सीराम शर्मा, धनलक्ष्मी श्रेष्ठ, प्रदेश सभामुख पिएसओ लुटजंग खड्का, उपसभामुख स्वकिय सचिव नारायण जि.सी जिल्लाका पत्रकार लगायतको सहभागिता रहेको थियो ।