मल्लरानीमा आजदेखि खाना महोत्सव सुरु भएको छ । नयाँ बर्षमा मल्लरानी जाऔं, प्राकृतिक रमणीय दृश्यवलोकनका साथ सरर मज्जा लिदै भगवती देवीको दर्शन गरी स्वादिष्ट परिकारका साथमा सांस्कृतिक कार्यक्रममा रमाऔं भन्ने मुल नाराका साथ दोस्रो मल्लरानी फूड फेस्टिवल २०८१ सुरु भएको हो ।

महोत्सवको उद्घाटन प्रतिनिधि सभा सदस्य सूर्य थापाले गरेका हुन् । कार्यक्रमको प्रमुख अतिथि रहेका थापाले खलंगा देखि मल्लरानी जाने सिढी निर्माणको लागि आवश्यक बजेट व्यवस्थाको पहल गर्ने बताए । मल्लरानीको पर्यटन प्रवद्र्धनका लागि सबैले जोड दिन आवश्यक रहेको सांसद थापाको भनाई थियो ।

त्यस्तै वडाध्यक्षहरुको तर्फबाट मल्लरानी गाउँपालिका ३ वडाध्यक्ष नोमराज पौडेलले मल्लरानी सहित मल्लरानी गाउँपालिका भित्रका सबै पर्यटकीय क्षेत्रको विकासका लागि सबैको हातेमाले आवश्यक रहको बताए ।

महोत्सवमा विभिन्न समुदायका फरकफरक खानाका परिकार, विभिन्न सांस्कृतिक कार्यक्रमहरु हुनेछन् । प्यूठान उद्योग बाणिज्य संघ मल्लरानी बजार क्षेत्र खलंगाको आयोजनामा भएको महोत्सव बैशाख २ गतेसम्म चल्ने आयोजकले जनाएको छ । मल्लरानीको पर्यटन प्रवद्र्धनका २०७९ सालदेखि प्यूठान उद्योग बाणिज्य संघ मल्लरानी बजार क्षेत्र ले खाना महोत्सव सञ्चालन गर्दै आएको छ ।