प्यूठान जिल्लाका सबै स्थानीय तह पूर्ण खोप सुनिश्चितता पालिका घोषणा भएका छन् । जन्मेदेखि १५ महिना र १६ देखि ५९ महिना सम्मका बालबालिकाहरुलाई दिनुपर्ने खोपहरु सबै पुरा भएपछि स्थानीय तह पूर्ण खोप सुनिश्चितता घोषणा गरिएको हो ।

बैशाख ३१ गते गौमुखी गाउँपालिकाबाट सुरु भएको पूर्ण खोप सुनिश्चितता कार्यक्रम झिमरुक गाउँपालिकामा जेष्ठ २७ गते सम्पन्न भएको स्वास्थ्य कार्यालय प्यूठानका खोप अधिकृत मधुसुदन खड्काले जानकारी दिए । उनका अनुसार जन्मेदेखि १५ महिनासम्मका ४ हजार ३ सय २५ र १६ देखि ५९ महिनासम्मका १३ हजार ३ सय ५८ जना बालबालिका रहेका छन् ।

सर्वेक्षण गरेर लगाएका ६७ जना मध्ये ११ जना बालबालिकाले एउटा पनि खोप नलगाएको पाईएको स्वास्थ्य कार्यालय प्यूठानले जनाएको छ । जिल्लाका सबै स्थानीय तह पूर्ण खोप सुनिश्चितता घोषणाभइ प्रक्रिया पुरा भईसकेको भन्दै अब जिल्लालाई नै पूर्ण खोप सुनिश्चितता जिल्ला घोषणा गर्ने तयारीमा रहेको पनि खोप अधिकृत खड्काको भनाई छ ।