प्यूठानको मल्लरानी गाउँपालिका ३ धरमपानी स्वास्थ्य चौकीमा कार्यरत स्वास्थ्यकर्मीहरुले सुत्केरीलाई स्ट्रेचरमा बोकेर घर पुर्‍याएका छन् । लगातार परेको तीन दिनको अविरल बर्षाले बाटो अवरुद्ध गरेपछि गाडी नचल्दा स्वास्थ्यकर्मीहरु मिलेर आइतबार सुत्केरीलाई स्ट्रेचरमा बोकी घर पुर्‍याएका हुन् ।

ऐरावती गाउँपालिका ६ काल्नेकी ३० बर्षिया जीवा वि.क असार २२ गते सुत्केरी हुन धरमपानी स्वास्थ्यचौकीमा आएको धरमपानी स्वास्थ्यचौकीका कार्यालय प्रमुख टुकाराम पोख्रेलले जानकारी दिए । उनका अनुसार जीवाले २२ गते राती नै छोरी जन्माइन् । उनलाई सुत्केरी गराउन आमाले अस्पताल लिएको कार्यालय प्रमुख पोख्रेलको भनाई छ ।

उनको यस अघिको ३ बर्षका एक छोरा छन् । श्रीमान रोजगारको शिलशीलामा भारतमा काम गर्दै आएका छन् ।
जीवाको घर देखी स्वास्थ्य चौकी जान करिब साढे २ किलोमिटर छ । तर उनको घरसम्म मोटरबाटो नपुगेका कारण पनि जान अप्ठ्यारो परेको प्रमुख पोख्रेले बताए । सुत्केरी जिवाले भनिन् “म गाडीमा चढ्दिन चढ्ने पैसाले बरु एक क्यारेट अण्डा किनेर खान्छु भन्दा यस्तो शब्दले मेरो मन छोयो पोख्रेलले भने, त्यसपछि हामीले सबै स्वास्थ्यकर्मी नै मिलेर उनलाई घरसम्म लगेका हौं ।”

मल्लरानी गाउँपालिका ३ का वडाध्यक्ष नोमराज पौडेलले राष्ट्रसेवक कर्मचारीले विपदको समयमा गरेको यो काम सराहनिय भएको बताएका छन् । अध्यक्ष पौडेलले स्वास्थ्यकर्मीहरुलाई धन्यवाद सहित यस्ता सामाजिक काममा जोकोही पनि जुट्न आवश्यक रहेको उल्लेख गरे ।