आज बिहान प्युठान नगरपालिका ९ र १० सीमा पर्ने बुढदेवि बजार क्षेत्रमा भुसवाङखोलामा आएको बाढी पस्दा दर्जनौँ स्थानीय विस्थापित भएका छन् । घरमा माटो ढुंगा सहितको लेदो पसेर स्थानीयको लत्ताकपडा,अन्नपात पुरेको छ । खोलामा लेदो आउने क्रम अझै रोकिएको छैन ।

माटोढुंगा हटाउन प्रयोग गरिएको एउटा एक्स्काभेटर(डोजर)समेत लेदोले पुरेको छ । स्थानीय बासी,नेपाल प्रहरी, नेपाली सेनाको टोलीले माटोढुंगा हटाएर पुरिएको एक्स्काभेटर(डोजर)निकाल्ने प्रयास गरिरहेका छन् । स्थानीयलाई सुरक्षित स्थानमा स्थानान्तरण गराइएको छ ।

ढुंगामाटो हटाएर स्थानीयको पुरिएका लत्ताकपडा, सरसामान निकाल्न थालिएको जिल्ला प्रहरी कार्यालय प्युठानका प्रहरी प्रमुख (डिएसपी) ईश्वर थापाले जानकारी दिए । यस अघि यही साउन १० गते बिहीबार पनि खोलोमा बाढी आएर स्थानीयको घर पुरेको थियो । गत वर्ष  मल्लरानी ४ खलङ्गा पातिहाल्ना बुकेनी सोल्लाना हुँदै अर्घाखाँची गुल्मी जोड्ने सडक निर्माण भएदेखि खोलामा बाढी आउन थालेको स्थानीय बताउँछन् ।