नेपाल टेलिकमका टावरहरू सञ्चालन नहुँदा स्थानीयले सास्ती बेहोर्नुपरेको छ । जिल्लामा निर्माण सम्पन्न भएका ४ वटा टावरहरू टेलिकमले सञ्चालनमा ल्याउन ढिलाइ गरेको छ । मल्लरानी गाउँपालिका .२ चुजा, झिमरुक गाउँपालिका ५ ओखरकोट, सरुमारानी गाउँपालिका ५ सौराकोट र प्यूठान नगरपालिका वडा नं. ६ माझकोटमा  निर्माण भएका टावरहरू वर्षौँदेखि सञ्चालनमा आएका छैनन् । यसले गर्दा स्थानीय सञ्चार सुविधाबाट वञ्चित हुन परेको छ ।

घरनजिकै टावर बने पनि सञ्चालन नभएकाले अर्घाखाँचीको टावरको भर पर्नुपरेको मल्लरानी गाउँपालिका २ चुजाका बलबहादुर केसीले गुनासो गरे । सरुमारानी गाउँपालिकाका केही ठाउँमा नेटवर्कले काम नगर्दा नागरिकले गुनासो गर्ने गरेको पालिका अध्यक्ष झग बहादुर विश्वकर्माले बताए ।

नेपाल टेलिकमले भने विद्युत् लाइन जडानको समस्याले टावरहरू समयमै सञ्चालनमा ल्याउन नसकेको बताएको छ । विद्युत् आपूर्तिको समस्या देखिएका केही टावरहरू समयमै सञ्चालन हुन नसकेको नेपाल टेलिकम प्यूठान बिजुवार शाखा प्रमुख निराजन श्रेष्ठले बताए ।

जिल्लामा  नेपाल टेलिकमका ४० वटा टावरहरू सञ्चालनमा छन् । सञ्चालन भइरहेका नेपाल टेलिकमका टावरहरूमा समेत ब्याट्री ब्याकअपको समस्या छ । लाइन जाँदा नेटवर्कको समस्या हुने गरेको स्थानीयले गुनासो गर्दछन् । समयमै मर्मत नहुने स्थानीय बताउँछन् । विपद्को समयमा विद्युत् लाइन सँगै फोनको नेटवर्क समेत जाँदा अत्यावश्यक सूचनाबाट वञ्चित हुनुपरेको गौमुखी गाउँपालिका अर्खाका स्थानीय मित्र थापाले बताए । नेपाल टेलिकमको टु जि र फोर जि सेवा बजारमै मात्र सीमित भएको प्यूठान नगरपालिका ६ माझकोटका स्थानीय मधुसूदन पोख्रेलले बताए । जिल्लामा ७० प्रतिशत टेलिफोन प्रयोगकर्ता नेपाल टेलिकमका ग्राहक रहेको बताउने उक्त संस्थाले चुस्त सेवा प्रवाहमा ध्यान नदिएको जिल्लावासीको गुनासो छ ।