प्यूठानमा स्थायी बन्ध्याकरण शिविर सञ्चालन भएको छ । आइतबार स्वर्गद्वारी नगरपालिका र माण्डवी गाउँपालिकाका बासीलाई लक्षित गरी देविस्थान स्वास्थ्य चौकीमा शिविर सञ्चालन गरिएको हो । शिविरबाट ७ जना महिलाले स्थायी बन्ध्याकरण साधन मिनिल्याप सेवा लिएको स्वास्थ्य कार्यालय प्यूठानका निमित्त कार्यालय प्रमुख मधुसूदन खड्काले जानकारी दिनुभयो ।

स्वास्थ्य कार्यालय प्यूठानको आयोजनामा सुनौलो परिवार, नेपाल (मेरी स्टोप्स, नेपाल)सहयोग तथा स्थानीय तहको सहकार्यमा शिविर सञ्चालन गरिएको हो ।परिवार नियोजनको स्थायी बन्ध्याकरण मिनिल्याप सेवा लिनेमा स्वर्गद्वारी नगरपालिका–२ का १, स्वर्गद्वारी नगरपालिका ४ का २ , माण्डवी गाउँपालिका ३ का २, माण्डवी गाउँपालिका–१ तिरामका १ र माण्डवी गाउँपालिका–२ मर्काबाङका  १ जना रहेका छन् ।

मङ्सिर ३ गते सरुमारानी गाउँपालिकाको बाङ्गेशाल स्वास्थ्य चौकी, ४ गते ऐरावती गाउँपालिकाको धुवाङ स्वास्थ्य चौकी, ६ गते गौमुखी गाउँपालिकाको पुजा स्वास्थ्य चौकी, ७ गते झिमरुक गाउँपालिकाको ओखरकोट स्वास्थ्य चौकी, ९ गते नौबहिनी गाउँपालिकाको सामुदायिक स्वास्थ्य इकाई बाहाने र ११ गते प्यूठान नगरपालिका र मल्लरानी गाउँपालिकाको लागि प्यूठान नगरपालिकाको सापडाडा स्वास्थ्य चौकी प्यूठानमा शिविर सञ्चालन हुने स्वास्थ्य कार्यालयले जनाएको छ । महिलाहरुले प्रयोग गर्ने स्थायी बन्ध्याकरणको साधन मिनिल्याप ९९ प्रतिशत गर्भ निरोध गर्न सफल रहेको खड्काले जानकारी दिए ।