२०८१ मङ्सिर १३प्यूठानको गौमुखी गाउँपालिकाका अर्खा र रजवारा गाउँलाई लामो झोलुङ्गे पुलले जोड्दैछ । पुलको बिहिबार प्रतिनिधि सभा सदस्य सुर्य बहादुर थापा क्षेत्रीले शिलन्यास गरेका छन् ।
गौमुखी गाउँपालिकाको वडा नं. १ लामाडाँडा देखि वडा नं. ३ को देउराली जोड्ने गरी पुल निर्माण थालिएको सस्पेन्सन बृज डिभिजन कार्यालय ललितपुरका इन्जिनियर गोपाल थापाले जानकारी दिए । पुल निर्माण गर्न दुई करोड ७२ लाख ७४ हजार रुपैयाँमा ठेक्का सम्झौता भएको थापाले बताए । ३ सय ६५ मिटर लम्बाइ र १ सय ८० मिटर अग्लो पुल २०८२ मङ्सिर २७ मा सम्पन्न गर्नेगरी अधिकारी/अपर तामाकोसी जेभीले ठेक्का पाएको छ ।
पुलको शिलन्यास गर्दै प्रतिनिधि सभा सदस्य थापाले जिल्लाकै लामो र अग्लो आयोजनाको रुपमा रहेको उक्त झोलुङ्गे पुललाई समयमै गुणस्तरीय तवरले सम्पन्न गर्नुपर्नेमा जोड दिए ।
निर्माण कम्पनिका प्रतिनिधि प्रकाश डाँगीले आगामी असारसम्ममा पुल निर्माणको काम सम्पन्न गर्ने लक्ष्य राखेको बताए ।
१८ वटा लठ्ठा रहेको झोलुङ्गे पुल निर्माणले सो क्षेत्रमा रहेको गौमुखीको पर्यटन प्रवर्धनमा टेवा पुग्ने विश्वास लिइएको छ । झण्डै साढे दुई घण्टा दुरिमा रहेको अर्खा र रजवाराको गाउँलाई पुल निर्माणले आवतजावमा सहजता ल्याउने भन्दै स्थानीय मुक्ति रानाले खुशी व्यक्त गरे । लामिडाडाँबाट देउराली पुग्न हिडेर १ घण्टा ३० मिनेट लाग्थ्यो । पुल निर्माणले धेरै सहज हुने रानाले बताए।
सस्पेन्सन बृज डिभिजन कार्यालयका अनुसार पुल निर्माणले अर्खा र रजवाराका १ हजार पाँच सय जना लाभान्वित हुनेछन् । पुलको निर्माण भएपछि सर्वसाधारणलाई आवत जावत गर्न सहज हुने र पर्यटन प्रबर्द्घनमा समेत टेवा पुग्ने स्थानीयले आसा गरेका छन् ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
