कालिका प्राथमिक विद्यालय प्यूठान नगरपालिका ४ बिजुवारमा अध्ययनरत बालबालिकालाई न्यानो कपडा वितरण गरिएको छ ।

मल्लरानी गाउँपालिका –४ मा घर भई पूर्वाधार विकास कार्यालय काभ्रेपलाञ्चोकका प्रमुख रहेका राजु श्रेष्ठले आफ्नो जन्मदिनको अवसरमा ७० जना विपन्न परिवारका विद्यार्थीहरुलाई ५५ हजार रुपैयाँ बराबरको कपडा वितरण गरेका हुन ।

बुधवार कालिका प्राथमिक विद्यालय व्यवस्थापन समितिका अध्यक्ष मन्जु नेपालीको अध्यक्षतामा भएको कार्यक्रमको प्रमुख अतिथि प्यूठान नगरपालिकाका संस्थापक मेयर अर्जून कुमार कक्षपति रहेका थिए ।

कार्यक्रममा बोल्दै कक्षपतिले समाजसेवी श्रेष्ठले गत वर्ष पनि स्वर्गद्धारी आश्रमका पुजारीहरुलाई न्यानो कपडा सहयोग गरेको भन्दै यस बर्ष पनि विद्यालयका बालबालिकालाई कपडा सहयोग गरेर राम्रो सामाजिक कार्य गरेकोे बताए ।

त्यस्तै विद्यालयका प्रधानाध्यापक सुदनकुमार कक्षपतिले जाडोको बेला विपन्न परिवारका बालबालिकालाई गरेको उक्त सहयोगले विद्यार्थीको पठनपाठनमा समेत टेवा पुग्ने विश्वास लिएको बताए । २०४६ सालमा स्थापना भएको विद्यालयमा हाल एक सय १४ जना विद्याथीले अध्ययन गर्दै आएका थिए । जसमध्य विपन्न परिवारका ७० जना विद्यार्थी बालबालिका लाइ कपडा वितरण गरिएको बताए ।

सहयोगदाता राजु श्रेष्ठलाई प्यूठान नगरपालिका –४ का वडा अध्यक्ष रेशम कार्कीले धन्यवाद दिंदै जन्मदिनको शुभकामना व्यक्त गरेका छन् ।

विद्यालयको प्राङगणमा गरिएको कार्यक्रममा प्यूठान नगरपालिका वडा नं.–३ का वडाध्यक्ष सुमन राज श्रेष्ठ , वडा नं.–४ का निवर्तमान वडाध्यक्ष अध्यक्ष लक्ष्मी प्रकाश राजभण्डारी , लायन्स क्लव अफ भित्रीकोटका अध्यक्ष महेश कुमार कक्षपति, प्रहरी, पत्रकार, अविभावक लगायतको उपस्थिति रहेको थियो ।

सहयोगदाता श्रेष्ठको जन्मदिन गत शनिबार परेको थियो ।