विपद् पूर्वको लगानीले ठूलो क्षतिबाट बचाउने सरोकारवालाहरुले बताएका छन् । विपद पूर्वको जोखिम व्यवस्थापन र विपद् प्रतिरोधि पूर्वाधार निर्माणले विपद् पस्चातको पूर्ननिर्माण र पूनस्थापना कार्यको लागत घटाउने उनिहरुको भनाई छ ।

शुक्रबार प्यूठान नगरपालिका ४ जुम्रीमा आयोजित पत्रकारहरुसंगको छलफल कार्यक्रममा सहजिकरण गर्दै विपद् व्यवस्थापनको क्षेत्रमा काम गर्ने ‘प्रतिवद्ध’ परियोजनाका कार्यक्रम व्यवस्थापक सालिकराम घिमिरेले पूर्व जोखिम व्यवस्थापक र प्रतिरोधि पूर्वाधारमा लगानी बढाउन आवश्यक रहेको बताए । अन्तराष्ट्रिय अध्ययनहरुले विपद प्रतिरोधि पूर्वाधारले विपद् पस्चातको पूर्ननिर्माणभन्दा ४ गुणा र पूर्व जोखिम व्यवस्थापनले विपद पस्चातको उद्धार राहतभन्दा १५ गुणा बढि लागत घटाउने प देखाएको घिमिरेले बताए । पूर्व जोखिम व्यवस्थापन अन्तरगत नियमित रुपमा गरिने पूर्व तयारी र पूर्वानुमान सूचनाको आधारमा गरिने पूर्व कार्यहरु पर्दछन् ।

प्रतिवद्ध परियोजनाले विपद्का सवालमा जिल्लाका सञ्चारकर्मीहरु संग छलफल गरेको छ । विपद्को पूर्वतयारी, मौसमजन्य सूचनाको आधारमा गरिने पूर्वकार्यहरु, विपदको समयमा हुने उद्धार तथा राहत र उपचारका कार्यहरु, विपद पस्चातको पूर्ननिर्माण र पूनःस्थापना लगायतका विषयमा छलफल गरिएको थियो । विपद्को समयमा तथ्यगत सूचना एकद्वार प्रणालीबाट समयमै उपलब्ध गराउनुपर्ने पत्रकारहरुले औँल्याएका छन् ।

कार्यक्रममा बोल्दै प्रमुख जिल्ला अधिकारी दिपकराज नेपालले विपदजन्य घटनाको सामना गर्न सवैको सहकार्य आवश्यक रहेको बताए । वर्षायाम सुरु भएसंगै विपद्जन्य घटनाहरुको जोखिम बढ्ने भएकाले सबै चनाखो हुन आवश्यक रहेको बताए ।

नेपाल पत्रकार महासंघका पूर्व अध्यक्ष गिरु प्रसाद भण्डारीले विपद्मा उद्धार, राहत संगै सूचना पनि महत्वपूर्ण हुने भएकाले यसलाई एकद्धार प्रणालिमा व्यवस्थित गर्नुपर्ने बताए । प्रतिवद्ध परियोजनाले जिल्लाका माण्डवी र सरुमारानी गाउँपालिकामा काम गर्दै आएको छ ।