प्यूठानको बाग्दुला–मच्छि–ठुलावेशी सडक यौटै मापदण्डमा डिजाईन हुने भएको छ । शुक्रबार झिमरुक गाउँपालिकामा भएको तीन स्थानीय तह र संघ र प्रदेश अन्तरगतका सरोकारवाला कार्यालयहरुको अन्तरक्रियाले बाग्दुलादेखि ठुलावेशी सम्मको सडक १० मिटर चौडाईमा विस्तार गर्ने समझदारी गरेको हो ।

उक्त अन्तरक्रियामा प्यूठान नगरपालिकाका मेयर, झिमरुक गाउँपालिकाका अध्यक्ष, गौमुखि गाउँपालिकाका कार्यावाहक अध्यक्ष, प्रमुख जिल्ला अधिकारी, प्रमुख प्रशासकीय अधिकृतहरु, सडक पूर्वाधार विकास कार्यालय, सडक डिभिजन कार्यालय, नेपाल विद्युत प्राधिकरणका कार्यालयप्रमुखहरु लगायतको उपस्थिती रहेको थियो ।

निर्णय अनुसार बाग्दुला पुल देखि ९ सय ५० मिटर दुरी (हाडिगैरा)सम्म सडक डिभिजन कार्यालय जस्पुरबाट १० मिटर चौडा हुनेगरी कटिङ्ग, नालि, स्टक्चर लगायत स्तरोन्नतिको काम हुनेछ । हाडिगैरादेखि बतासेडाडासम्म सोहि मापदण्डमा कटिङ्ग, स्टक्चर, नालि र कालोपत्रेको सम्पुर्ण कार्य सडक पूर्वाधार विकास कार्यालय गर्नेछ । बतासेडाडा देखि जिमुरखोला सम्म झिमरुक गाउँपालिकाले सोहि मापदण्डमा कार्य गर्नेछ । गत आर्थिक वर्षमा कटिङ्ग, प्लमवाल, नालि, कजवेको काम भएको छ भने संघीय समपुरक अनुदानबाट चालु आर्थिक वर्षमा उक्त खण्डमा कालोपत्रेको काम हुनेछ । जिमुरखोलादेखि मच्छि सम्मको खण्डमा सोहि मापदण्डमा स्तरोन्नतिको कार्य सडक पूर्वाधार विकास कार्यालय बाट हुनेछ । भने मच्छि बजारमा २ सय ४ मिटर आर.सि.सि. ढलान र मच्छिदेखि ढाड आरुपाटा १० मिटर चौडाईकै मापदण्डमा व्याककटिङ्ग, नाला, स्टक्चर लगायतको काम सडक डिभिजन कार्यालयमार्फत हुनेछ ।

गौमुखी गाउँपालिका पहुँच मार्गको कार्य गर्दा समेत बाग्दुला मच्छि खण्डको स्टक्चर अनुसारकै ठेक्का लगाउने निर्णय भएको छ । सडक विस्तारको क्रममा विद्युत पोल सार्ने, खानेपानी र सिचाईमा हुने क्षेतीको ममर्तका लागि आवश्यक रकम समेत स्टमेट गर्ने समझदारी भएको छ ।

यो निर्णयसंगै विभिन्न निकायबाट आएको बजेट कार्यन्वयनको अन्यौलता हटेको झिमरुक गाउँपालिकाका अध्यक्ष पित बहादुर महतरा क्षेत्रीले बताए ।