जापान सरकारले १ करोड बढि लागतमा निर्माण गरेर प्यूठान नगरपालिकालाई हस्तान्तरण गरेको बेसार प्रशोधन केन्द्र अलपत्र परेको छ । प्यूठान नगरपालिका – ८ गेजवाङ्गमा रहेको बेसार प्रसोधन केन्द्र प्रयोगविहिन बनेको हो । प्रशोधन केन्द्र सञ्चालनमा प्यूठान नगरपालिकाको ध्यान,व्यवस्थापन र योजना नहुँदा करोड लागतको उद्योग अलपत्र परेको स्थानीयले गुनासो गरेका छन् ।

बेसार प्रशोधन केन्द्र अन्तरगत कृषकले पाउनुपर्ने १० वटा हाते ट्याक्टर र २ वटा मिल अझैसम्म नपाएको स्थानीय कृषक ऋषिराम पौडेलले बताए । २०८० पुस ३ गते प्रशोधन केन्द्र उद्घाटन गरिएको थियो । प्रशोधन केन्द्रमा प्यूठान नगरपालिकाले करार सेवामा एकजना कर्मचारी समेत भर्ना गरेको थियो । प्रशोधन केन्द्र सञ्चालनमा नआउँदा त्यहाँ राखिएको कर्मचारीको काम कुरुवा जस्तै भएको छ ।
बेसार प्रशोधन केन्द्र स्थानीय सरकारलाई हस्तान्तरण भएसंगै स्थानीय कृषकलाई व्यवसायी बनाउन कृषकलाई बेसारको विउ वितरण, तालिम लगायतका कार्यक्रम गरिएको थियो । तर, प्रशोधन केन्द्र सञ्चालनमा नआउँदा जंगली जनावरबाट हैरान भएर बेसार खेतिमा लागेका किसानले समस्या भोगेको वडाध्यक्ष पदम बहादुर थापा क्षेत्रीले बताए ।

पूर्व वडाअध्यक्ष लिलाप सिंह के‍.सीले स्थानीय कृषकलाई व्यवसायी र आत्मनिर्भर बनाउन जापान सरकारसंगको सहकार्यमा प्रशोधन केन्द्र स्थापना भएपनि सञ्चालनमा नआउँदा स्थानीय निराश भएको बताए । सुरुमा परीक्षणका लागि नगरपालिकाले स्थानीय कृषकबाट ३ सय किलाे बेसार खरिद गरेको थियो । उद्घाटन लगत्तै मेसिन बिग्रेपछि सञ्चालन गर्न नसकिएको प्यूठान नगरपालिका कृषि शाखा प्रमुख श्रृजना सेढाईले बताईन् ।
चालु आर्थिक वर्षदेखि प्रशोधन केन्द्र सञ्चालनमा ल्याउने तयारी गरेको उपमेयर देबेन्द्र बर्माले बताए । प्रशोधन केन्द्र सञ्चालनका लागि १० लाख रुपैयाँ विनियोजन गरिएको बर्माले जानकारी दिए। गत आर्थिक वर्षमा पनि प्रशोधन केन्द्रका लागि ८ लाख विनियोजन गरिएको थियो । त्यसबाट २ लाख ९० हजार ७ सय १९ रुपैयाँ खर्च भएको नगरपालिकाले जनाएको छ ।