प्यूठान नगरपालिका वडा नं. ६ का भुपाल गयल मगर लामो समयदेखि पक्षघात भएर विस्तारामै थलिएका छन्को । आफ्ना दैनिकी समेत अरुको सहारामा चलाउनुुपर्ने बाध्यतामा रहनुभएका गयल मगरको घरमा बुधबार प्यूठान नगरपालिकाका उपमेयर देवेन्द्र वर्मा सहितको टोलि चिकित्सक लगेर पुग्यो ।

डा. भावना पोख्रेलले सिफारिस गरेपछि अपांगता परिचयपत्र वितरण कार्यविधि २०७८ बमोजिम गठित स्थानीय समन्वय समितिका संयोजक समेत रहेका वर्माले गयललाई ‘क’ वर्गको अपांगता परिचयपत्र हस्तान्तरण गरे।

बुधबार नै प्यूठान नगरपालिका वडा नं. ८ मा पुगेर मेरुदण्ड भाँचिएर थला पर्नुभएका मधु कुमाललाई पनि ‘ख’ वर्गको परिचयपत्र दिईएको छ ।
प्यूठान नगरपालिकाले अशक्तताको कारण परिचयपत्र बनाउन अप्ठ्यारो भएका नगरवासिलाई घरमै पुगेर अपांगता परिचयपत्र वितरण गर्ने गरेको छ ।

‘चिकित्सकको सिफारिसमा स्थानीय समन्वय समितिले परिचयपत्र उपलब्ध गराउँछ’ उपमेयर एवं समितिका संयोजक वर्माले भने –’जनप्रतिनिधिको समन्वयमा निवेदन प्राप्त भएपछि हामि घरमै पुगेर परिचयपत्र वितरण गरेका छौँ । अशक्त नगरवासिलाई घरमै पुगेर परिचय पत्र दिने कार्य आगामि दिनमा पनि निरन्तर रहन्छ ।’