पाचौँ राष्ट्रिय हाप्कीडो च्याम्पेन्सीप प्यूठानमा हुने भएको छ । नेपाल मार्सल आर्ट्स हाप्कीडो संघ प्युठानको आयोजना तथा केन्द्र र प्रदेशको समन्वयमा आगामी चैत्र ५ देखि ७ गतेसम्म केन्द्रिय स्तरको प्रतियोगिता हुने भएको हो ।
सोमबार पत्रकार सम्मेलन गर्दै हाप्कीडो संघ प्रदेश कमिटिका सचीव एवं संघका प्यूठान जिल्ला अध्यक्ष टेकराज केसीले देश भरका १० हजार भन्दा बढि खेलाडिको उपस्थीतिमा प्रतियोगिता हुने बताएका छन् । “राष्ट्रका लागि खेलकुद स्वास्थ्यका लागि खेलकुद” भन्ने मुल नारालाई आत्मसात गर्दै माण्डवी गाउँपालिकाको जस्पुर खेलमैदानमा हुने प्रतियोगितामा २० केजी देखि ७५ केजि तौल विचका समुहका खेलाडिलाई खेलमा सहभागि गराउन लागेको के. सी. को भनाई छ ।
हालसम्म जिल्लामा राष्ट्रिय स्तरको खेल नभएको भन्दै यो खेलले जिल्ला चिनाउन पनि महत्वपुर्ण भुमिका खेल्ने आयोजकको भनाई छ । देशभरबाट उपस्थीत खेलाडिहरुलाई व्यवस्थापनको लागि तयारी भैसकेको भन्दै यो खेलबाट जिल्ला चिनाउन सवैको सहयोग रहने पनि आयोजकले जनाएको छ । तोकिएको तौल समुहका विजेता खेलाडिलाई नगद पुरस्कार संगै मेडल र प्रमाण पत्र दिने आयोजकले जानकारी दिएको छ ।
खेलाडी सन्जिब बिष्टले हाप्किडो खेल सुरु गरेदेखि पढाई सङ्गै आफ्नो भविष्य निर्धारण गर्न, स्वस्थ र निरोगी बन्न पुगेको बताएका छन् । खेल सुरु गरेदेखि आफ्नो खाली समयको समेत व्यवस्थापन भएको बताउछन् । यस्तै खेलाडी सुबस्ती के. एम. ले खेलाडी राष्ट्रको गहना भएकाले सम्पुर्ण खेलाडीको अभिभावकहरुले सकारात्मक सहयोग गरे खेलबाटै जीवन धान्न सकिने बताएका छन् ।
प्यूठान जिल्लामा हाप्कीडो खेलमा खेलाडिको आकर्षण राम्रो भएकोले जिल्लामै राष्ट्रिय स्तरको च्याम्पेन्सीप राख्न सफल भएको आयोजकको भनाई छ ।