गणतान्त्रिक संविधान जारी भए पश्चात् स्थानीय निकायको दोस्रो कार्यकालको निर्वाचन सफलता पूर्वक सम्पन्न भएको छ । निर्वाचनको परिणामहरू आइरहेको छ । यो निर्वाचनको मत परिणामहरु हेर्दा पहिलेको भन्दा फरक छैन ।

२०७४ सालको स्थानीय निकायको निर्वाचन खास कारणले चर्चामा थियो प्रचण्डले आफ्नी छोरीको सहज जित सुनिश्चित गर्न भरतपुर महानगरमा गठबन्धनका लागि कांग्रेस सभापति देउवालाई सहमत गराएको विषय । त्यसले चौतर्फी चर्चा थियो । मत पत्र च्याथ्ने सम्मको घटना समेत घटेको थियो । त्यसले आलोचना र निन्दा निम्त्याएको थियो । त्यसैको प्रतिफल, देशभरका मतगणना केन्द्रहरूमा अहिले तारजालीको व्यवस्था गरेर मतगणना गरियो । यसपालि भने त्यस बेलाको झै मतपत्र च्याथ्ने घटना अझै कतै भएका छैनन् । घटेका छैनन् । यो निर्वाचनमा देशभरका पालिकाहरूबाट सबै राजनीतिक दलले आ–आफ्नो धरातल नाप्ने अवसर पाए । यसबाट संसदको परिणाम त्रिशंकु हुने प्रक्षेपण भयो । नेपाली कांग्रेस पहिलो, नेकपा एमाले दोस्रो र नेकपा माओवादी तेस्रो शक्तिका रूपमा अंकित हुने प्रारम्भीक मतपरिणामहरुले देखाइसकेको छ । यो निर्वाचनमा भएको गठबन्धनले कांग्रेसलाई दोस्रोबाट पहिलो शक्ति बनाएको छ ।

दोस्रो पटक गाँसिएको लगनगाँठो नफुस्कियोस् भन्नेमा देउवा सचेत छन् । किनभने यो गठबन्धन संसदीय निर्वाचनमा समेत भयो भने कांग्रेस पहिलो पार्टी बन्ने पक्का जस्तो भएको छ । स्थानीय सरकारका लागि भएको चुनावमा दुई ठूला दलहरूले नै गठबन्धन गरेपछि नागरिक समुदायबाटै यस्तो प्रवृत्तिको विरोध भइरहेको छ । स्वतन्त्र छनोटको अधिकारलाई कुण्ठित गरिएको छ । गठबन्धनकै कारण शीर्ष दुई पदमा संविधानले परिकल्पना गरेको लिंगीय सन्तुलनमा समेत असर परेको छ । गठबन्धनका कारण देशभरबाट प्रमुख र उपप्रमुखमा महिला निकै कम निर्वाचित भएका छन् ।