करार कर्मचारी हटाउने निर्णय गरेको स्वर्गद्वारी नगरपालिकाले निर्णय सच्चाउँदै १४ जना करार कर्मचारीको म्याद थप गरेको छ । नयाँ जनप्रतिनिधि आएसँगै करार कर्मचारी निसानामा परेका थिए । करार कर्मचारी हटाउँदा स्थानीय तहमा नियमित सेवा प्रभावित बनेको थियो ।
साउन १ बाट करार कर्मचारीको म्याद थप नहँुदा स्वर्गद्धारी नगरपालिकाका स्वास्थ्य संस्था प्रभावित भएका थिए । नगरपालिकाले साउन १ देखि लागु हुने गरी ३४ जना करार कर्मचारीलाई एकैपटक करार नविकरण नगर्न निर्णय गरेको थियो । कर्मचारीलाई करार सेवाको म्यान थप नहुँने जानकारी गराउँदै नगरप्रमुख टेकप्रसाद भण्डारीले पत्र काटेका थिए । ३४ जना मध्य १४ जना कर्मचारीलाई पुनरवहाली गरीएको छ ।

नगरपालिकाकाले कर्मचारी हटाउँदै थमाउँदै गर्ने शैलीले नयाँ जनप्रतिनिधिको कमजोरी छताछुल्ल भएको छ । नियमित सेवा दिइरहेका कर्मचारीलाई एकै पटक निश्कासन गरेकोले सेवा प्रभावित हुँदा आम जनताबाट गुनासो आएपछि नगरपालिकाले केहि कर्मचारीको म्याद थप गरेको हो । यो विषयमा आम सर्वसाधारण सहित नेकपा एमाले स्वर्गद्धारी नगरकमिटिले करार कर्मचारी थमौतीको माग गर्दै नगरप्रमुख टेकप्रसाद भण्डारीलाई ज्ञापन पत्र बुझाएको थियो ।