प्यूठानमा रोपिएको धानमा यस वर्ष नयाँ रोगको प्रकोप देखिएको छ । रोपिएको धानमा नयाँ रोग तथा किराको प्रकोपले किसानहरु चिन्तित वनेका छन् ।

जिल्लाको माण्डवी गाउँपालिका अन्तर्गत नयाँगाउँ, लामाचौर, प्यूठान नगरपालिकाको झिमरुक फाट, सरुमारानी गाउँपालिकाको बागेंसाल, मल्लरानी गाउँपालिका र झिमरुक गाउँपालिका अन्तर्गतका किसानका धान खेतमा भर्खरै रोपेका धानका बोटहरु पहेलिदै सुक्न थालेपछि किसानहरु चिन्तित बनेका हुन् ।
उक्त धान वालीमा देखिएको समस्यालाई मध्यनजर गर्दै रोगको पहिचान एवम् व्यवस्थापन तथा समस्या समाधानका लागि प्रधानमन्त्री कृषि आधुनिकीकरण परियोजना परियोजना इकाइ प्यूठानको पहलमा नेपाल कृषि अनुसन्धान परिषद् (नार्क)का विज्ञ टोलीद्धारा अनुगमन गरि रोगको परिक्षण थालिएको छ ।
यस वर्ष प्यूठानका धान खेतका बोटमा विभिन्न ६ प्रकारका नयाँ रोगको प्रकोप देखिएको छ ।
प्रधानमन्त्री कृषि आधुनिकीकरण परियोजना परियोजना इकाइ धान जोनले किसानहरुको समस्यालाई पहिचान गर्न किसानको धान खेतमै पुगेतापनि धानबालीमा धेरै प्रकारका समस्या देखिएका कारण आफुहरुले रोग पत्ता लगाउन नसकेपछि सोमबार कृषि अनुसन्धान केन्द्र (नार्क) का विज्ञ टोलीको परिक्षणबाट धानको जरामा गड्यौला लाग्ने समस्या, मरुवा, खैरो थोप्ले रोग र जरा कुहिने रोग लगाएत ६ प्रकारका रोगहरु पुष्टि भएको परियोजनाका धान जोन इकाइका प्रमुख चुमानसिंङ गिरीले जानकारी दिए ।
उनका अनुसार जिल्लाका करिब १ हजार रोपनी जग्गामा यस्ता रोगको समस्या देखिएको छ । उक्त समस्या समाधान तथा व्यवस्थापनको लागि किसानहरुले नजिकैको कृषि शाखा तथा प्रधानमन्त्री कृषि आधुनिकीकरण परियोजना परियोजना इकाइ धान जोनको कार्यालय प्यूठानमा सम्पर्क गर्न कार्यालयले आग्रह गरेको छ ।