जिल्लाभर ५ वर्ष देखि ११ वर्ष भित्रका बालबालिकालाई कोभिड–१९ विरुद्धकोे फाइजर–बायोएनटेक खोपको दोस्रो मात्रा दिइने भएको छ । पहिलो मात्रा लगाएको २१ दिन पुरा गरिसकेका बालबालिकालाई जिल्लाका नौ वटै स्थानीय तहहरुमा भाद्र २७ गते देखि आश्विन २ गतेसम्म क्रमशः कोभिड –१९ विरुद्धको खोप दिइने स्वास्थ्य कार्यालय प्यूठानका प्रमुख मधुसुदन खड्काले बताए । खोपको दोस्रो मात्रा ३५ हजार १ सय ४५ जना बालबालिकालाई दिइने प्रमुख खड्काले जानकारी गराएका छन् ।

जिल्लामा पहिलो मात्राको लागि लक्षित बालबालिकाहरु ३८ हजार ४ सय ९४ जना मध्ये ३५ हजार १ सय ४५ जनाले पहिलो मात्रा लगाएका थिए । पहिलो मात्रा लगाउन छुटेका सोहि उमेरका बालबालिकालाई पनि यसै अभियानमा पहिलो मात्राको खोप समेत दिइने स्वास्थ्य कार्यालय प्यूठानले जनाएको छ । उक्त कार्यालयको निर्देशनअनुसार जिल्लाका नौ वटै स्थानीय तहहरुले भदौ ५ गते देखी ११ गते सम्म एकै चरणमा खोप अभियान चलाएको थियो ।