गौमुखी गाउँपालिकाले आफ्नो पालिका भित्रका विभिन्न ठाउँलाई कृषि उत्पादन पकेट क्षेत्र निर्माण गर्ने भएको छ । पालिका अनुसार कोदो, फापर, सुन कागती, केरा, भट्टमास, अम्बा, दाँते ओखर लगायतका पकेट क्षेत्र निर्माण गरिदँै छ । आलुको बिउ उत्पादन पकेट क्षेत्र भने सञ्चालनमा आइसकेको छ । आलुको विउ उत्पादन केन्द्र लुम्बिनी प्रदेशकै पहिलो भएको पालिका उपाध्यक्ष महावीर रानाले जानकारी दिए ।

पालिकाको विभिन्न क्षेत्र जस्तै जाँडगाउँमा सुन कागती २ हजार विरुवा रोप्ने, वाग्लिवाङमा दाँते ओखर २ हजार विरुवा, काफलबासा, फोर्साखर्क, कल्ले, ठोक्रेसा, भेडाबारी, गाउँफाटा, बरबाङ्ग लगायतका गाउँहरुलाई समेटेर केराबारी बनाई २ हजार विरुवा रोप्ने, खुङ र लिवाङको केहि भुभागमा अम्बा २ हजार विरुवा रोपेर पकेट क्षेत्र निर्माण गरिदै छ भने लिवाङको बुट्टीचौरमा आलुको बिउ उत्पादन केन्द्र सञ्चालनमा आइसकेको छ । रैथाने वाली प्रवद्धनका लागि अर्खा र रजवाराका केहि उच्च भुभागहरुमा फापर वाली पकेट क्षेत्र बनाइने भएको छ तथा फापर, कोदो र भटमास सहितको पकेट क्षेत्र निर्माण गरिएको समेत राना बताए ।

पालिकाले, कृषकले उत्पादन गरेका सबै कृषिजन्य उत्पादनहरु खरिद गरि बजारीकरण गरिदिने नीति ल्याएको छ । कृषिजन्य उत्पादनहरुको मुल्य पालिकाले नै निर्धारण गरि बजारिकरण गर्ने र कृषि एम्बुलेन्स सेवा सञ्चालनमा ल्याउने भएको रानाले बताए । कृषि एम्बुलेन्सले कृषकका घरघरमा गई कृषिजन्य उत्पादन खरिद गर्ने र बजारसम्म पुर्याई व्यवस्थापन गर्ने भएको छ । प्रयाप्त र गुणस्तरीय उत्पादनका लागि कृषकलाई व्यवसायीक बनाउने र आफ्नो कार्यकाल भित्रै व्यवसायीककरण, आधुनिकिकरण र यन्त्रिककरण यी तिन सुत्रको आधारमा यहाँका जनताको आर्थिक जीवन स्तर माथि उकास्न भरपूर पहल गर्ने रानाको भनाई छ । कृषि पकेट क्षेत्र व्यवस्थित बनाउन प्रत्येक क्षेत्रमा कृषक समुहहरु तथा सहकारी समुह गठन गरेको समेत उनले बताए ।