मल्लरानी गाउँपालिका वडा नं.३ का अध्यक्ष नोमराज पौडेलले नेपाल रेडक्रस सोसाइटी धरमपानी उपशाखामा बुवा आमाको नाममा अक्षयकोष स्थापना गरेका छन् । पौडेलले जन्मदिनको अवसर पारेर धरमपानी उपशाखाकी सभापती मोति पौडेललाई २१ हजार ४ सय ५० रुपैयाको चेक हस्तान्तरण गरेका हुन् । उनले आफु निर्वाचित हुनुपूर्व नेरेसो.धरमपानी उपशाखालाई पहिलो महिनाको सेवा सुविधा वापतको रकम दिने बाचा गरेका थिए । सोही अनुसार मंगलबार केक माथि बत्ती बालेर उद्धघाटन गर्दै निर्वतमान वडा अध्यक्ष गिरीराज पौडेलको उपस्थितीमा चेक हस्तान्तरण गरेका हुन् ।
साथै अध्यक्ष पौडेलले सहयोग गरेको रकमबाट बुवा आमाको नाममा केशवराज, वेलाकुमारी अक्षयकोष स्थापना गरेको बताएका छन् । जन्मदिनको अवसरमा नेरेसो उपशाखामा अक्षयकोष स्थापना गरिएको यो पहिलोपटक हो । अक्षयकोषमा संकलित रकम नेरेसो धरमपानी उपशाखाको मातहतमा रहने गरी सामाजिक कार्यमा खर्च गरिने अध्यक्ष पौडेलले बताए ।