लामो समयको प्रतिक्षापछि प्यूठान नगरपालिका ६, माझकोटस्थित झुलेनीमा ३ लाख ५० हजार लिटर पानी संकलन गर्नेगरि ट्याङकी निर्माण भएको छ । प्रदेश सरकारको बजेटमा खानेपानी तथा सरसफाई डिभिजन कार्यालय प्यूठान मार्फत ठेक्का भएर ट्याङकी निर्माण भएको हो ।

लिप्ट प्रविधिमार्फत पानी तानेर साविकको माझकोट गाविसका झण्डै पाँच सय घरधुरीलाई पानीको प्यास मेटाउनेगरि (माझकोट घाय झुलेनी लिप्ट खानेपानी योजना) निर्माणको काम अगाडि बढाईएको छ । माझकोटको झुलेनी र गुरुङ्गगाउँमा दुई स्किम बनाएर योजना निर्माण भइरहेको खानेपानी तथा सरसफाई डिभिजन कार्यालय प्यूठानका ईन्जिनियर खगेन्द्र खत्रीले जानकारी दिए ।

१२ करोड लागत (स्टिमेट) रहेको योजना क्रमागतरुपमा बजेट आएर काम भइरहेको छ । यसवर्ष झुलेनीमा (पावर नेपाल कन्सल्ट एण्ड कन्स्ट्रक्सन प्रा.लि. काठमाडौले) ठेक्का पारेर झुलेनीको (ट्याङकी ) निमाण पूरा भएको खत्रीले बताए । उपभोत्ता समिति मार्फत गतवर्ष घाय र गुरुङगाउँमा एक-एक वटा लिफ्टीङ ट्याङकी निमार्ण भइसकेका छन् ।

दुबै स्थानमा बिद्युतलाइन बिस्तार, बिच–बिचमा साना ट्याङकी निर्माण लगायतका काम बाँकी छन् । बर्सेनि थोरै-थोरै आउने बजेटका कारण योजना पूरा गर्न समस्या भइरहेको कार्यालयले जनाएको छ । पानीको सधै समस्या हुने बाक्लो बसोवास रहेको माझकोटमा निर्माण भइरहेको खानेपानी योजनाले माझकोवासीको खानेपानीको प्यास मेटाउने आसा स्थानीयले गरेका छन् ।

‘माझकोटको सबैभन्दा अग्लो स्थान झुलेनीमा ट्याङकी बन्दै छ,’ खानेपानी उपभोक्ता समितिका सचिब बालाराम केसीले भने, ‘यो योजनाले माझकोटवासीको पानीको प्यास मेटाउने आसा गरेका छौं ।’