जिल्लाको माण्डवी गाउँपालिका वडा नं. ४, दगचुनेमा आगलागी हुँदा २ घरगोठ जलेर नष्ट भएको छ । हिँजोदेखि जंगलमा लागेको आगो फैलिदा स्थानीय हरिकला बुढा मगर र हिरा बुढा मगरको घरगोठमा आगलागी भएको हो ।
आगलागीबाट घरगेठमा रहेका अन्नपात, लत्ताकपडा, घाँस, दाउरा सबै जलेर नष्ट भएको गाउँपालिका अध्यक्ष नवराज अधिकारीले जानकारी दिए । अहिले पनि घरगोठमा आगलागी भइरहेको छ भने घर गोठमा रहेका सामान निकाल्न सक्ने अवस्था नरहेको उनले जानकारी दिए ।
आगलागीबाट अन्य ७ घर समेत जोखिममा रहेका छन् । गाउँपालिकाका जनप्रतिनिधि सहित कर्मचारी र स्थानीयवासी अग्नि नियन्त्रणको लागि खटिएका छन् । जंगलबाट आगलागी बस्तिमा पसेकोले अग्नि नियन्त्रणमा समस्या भइरहेको छ ।
प्रहरी, रेडक्रस लगायतका अग्नि नियन्त्रक र सुरक्षाकर्मि घटना स्थलमा पुग्दैछन् भने आगलागीबाट भएको क्षतिको अनुमान भइसकेको छैन । हावा हुरी र पानी अभावमा कारण अग्नि नियन्त्रणमा ल्याउन कठिन भइरहेको छ ।
