२०८० जेठ २३सरकारी जागिर खाएर सुखमय जीवन बिताउने रहर सबैको हुन्छ । सरकारी जागिर पछिको पेन्सन बाँकि जीवन बिताउने सजिलो माध्यम हो । गाउँमै माध्यामिक तहसम्मको अध्ययन पुरा गरे नेपाल प्रहरीमा जागिर खाएका ऐरावती गाउँपालिका वडा नं. ३, जाबुनेका प्रेम पुन भने पेन्सनपछि कृषि पेसामा होमिएर सबैलाइ उत्पादनमा लाग्नुपर्छ भन्ने सन्देश दिएका छन् ।
पुनले राम्री थुम पशु तथा कृषि फर्म दर्ता गरेर सञ्चालन गरेका छन् । सुरुमा ११ वटा बाख्राबाट व्यवसायिक रुपमा बाख्रापालन थालेका उनले ३ लाख ३० हजारमा जिल्ला बाहिरबाट बोयर बोका समेत खरिद गरि ल्याएका थिए । २०७२ सालबाट सुरु गरेको फर्ममा उनले २०७५ सालसम्म आम्दानी लिन सकेनन् ।
पेन्सनको पैसा र गाउँघरमा सापटि लिएर थालेको व्यवसायबाट चौंथो वर्षबाट आम्दानी दिन थालेपछि उनी बाख्रापालनमा हौसीएका छन् । ‘चौंथो वर्षमा ९ वटा पाठापाठि बिक्रिबाट २ लाख आम्दानी भएको थियो’, उनले भने, ‘पाँचौ वर्ष वर्षमा ३ लाख जति आम्दानी भयो ।’
हालसम्म बाख्रा खोर, घाँस खेती लगायत काममा करिब ८० लाख भन्दा बढि लगानी लागेको पुनले बताए । फर्ममा अहिले ६२ वटा बाख्रा छन् । जसमध्ये ४ वटा माउँ बाख्रा छन् भने अन्य पाठापाठि र एक वटा बोयर बोका छ । उनले १ सय ३० वटा सम्म बाख्रा पाल्न सक्ने गरी खोर निर्माण गरेका छन् ।
‘अबको ६ वर्षमा फर्मको लगानी उठिसक्ने अनुमान गरेको छुँ’, उनले भने, ‘त्यसपछि बल्ल फर्म नाफामा जाने आशा गरेको छुँ ।’ बाख्रा पालनमा उनको श्रीमती प्रेमकला सँगै छोराले पनि सहयोग गर्दै आएका छन् । बाख्रापालनका लागि घाँस बढि चाहिने हुँदा पुनले आफ्नो भएभरको जग्गामा घाँस खेति गरेका छन् ।
‘बाख्रालाई चराउनभन्दा काटेको घाँसबाट फाइदा हुने रहेछ’ उनले भने, ‘मैले आफ्नो भएभरको जग्गामा घाँस खेती गरेको छुँ ।’उनका अनुसार ३६ रोपनी क्षेत्रफलमा नेप्पियर, पासपालम, किम्वु, दालचिनी लगायत बिभिन्न स्थानीय प्रजातिका समेत घाँस लगाएका छन् ।
