मल्लरानी गाउँपालिका–४, खलगांमा स्थानीय ५ जना मिलेर मल्लरानी चप्पल उद्योग सञ्चालनमा ल्याएका छन् । गत जेठ महिनाबाट ५ जना महिलाले सामुहिक रुपमा चप्पल उद्योग सञ्चालन गरेका हुन् । समुहमा नर्मदा भट्ट,अरुणा बुढाथोकी, तुलसा थापा, गोमा श्रेष्ठ र सुनिता शाही रहेका छन् ।

उद्योगबाट दैनिक ६/७ जोडी चप्पलहरु उत्पादन हुन्छ । मल्लरानी गाउँपालिकाले गरिबी निवारणका लागि लघु उद्यम सीप विकास तालिम दिएपछि उनीहरुले उद्योग सञ्चालन गरेका हुन् । उद्योग स्थापनाको लागि ५० हजार लगानी गरिएको चप्पल उद्योगका अध्यक्ष नर्मदा भट्टले बताईन् । गाउँपालिकाले चप्पल सिलाउनको लागि एउटा मेसिन समेत उपलब्ध गराएको अध्यक्ष भट्टले जानकारी दिइन् । उनीहरुले उत्पादन गरेको चप्पल जिल्ला बाहिर दाङ, नेपालगञ्ज, काठमाडौं लगायतका जिल्लाहरुमा विक्री हुँदै आएको छ ।

अहिलेसम्म उनीहरुले फुटकरबाट ३५ हजार भन्दा बढीको चप्पलहरु बिक्री गरिसकेको बताउँछन् । ग्राहकहरुले पनि चप्पलको मुल्य र चप्पल राम्रो भएको भन्दै मन पराएका छन् । ‘हामीले थोकमा बिक्री गर्नको लागि खलगां बाग्दुला बजारमा पुर्‍यायौं,’उनले भनिन्,‘व्यापारीले महंगो भन्दै राख्न मानेनन् ।’ उनीहरुले उत्पादन गरेको चप्पलले स्थानीय बजारमा भने राम्रो मुल्य पाएको छैन् । मल्लरानी गाउँपालिकाले बजारको लागि व्यवस्थापन गर्न व्यसायीहरुसंग अन्तरक्रिया कार्यक्रम समेत गरेको थियो । जिल्लामा उनीहरुले उत्पादन गरेको चप्पल महंगो भएको भन्दै थोकमा विक्री सुन्य जस्तै छ । स्थानीय उद्योगबाट उत्पादन भएका सामानहरु जिल्ला मै विक्री गर्ने वातावरण मिलाउन स्थानीय सरकारले पहल गर्नु पर्ने उनीहरुले बताए । उद्योगबाट उनीहरु सन्तुष्ट भएको बताएका छन् । विहान बेलुका घरको काम सकेर दिउँसोको समय उनीहरु आफ्नै उद्योगमा व्यस्त हुन्छन् ।