विद्यालय शिक्षा विधेयक प्रति असन्तुष्टि जनाउँदै नेपाल शिक्षक महासंघले आन्दोलन सुरु गरेको छ। भर्खरै सार्वजनिक भएको विद्यालय शिक्षा ऐन २०८० को मस्यौदामा रहेका केहि दफाहरु संविधानले प्रदान गरेको ट्रेड युनियन अधिकार, शिक्षक कर्मचारीको पेशागत सुरक्षा र स्वाभिमानको खिलाफमा रहेको भन्दै नेपाल शिक्षक महासंघले आन्दोलनको घोषणा गरेको थियो ।

नेपाल शिक्षक महासंघले घोषणा गरेको आन्दोलनका कार्यक्रम अन्तर्गत आज देशभरका ७ सय ५३ वटै स्थानीय तहमा कार्यरत शिक्षकहरुले पालिकाहरुमा धर्ना कार्यक्रम गरेका छन् । आइतबार जिल्लाका पालिकाहरुमा विहान ११ बजेदेखि २ बजेसम्म धर्ना कार्यक्रम गरेको हो । श्रावण १६ गते मन्त्री परिषदबाट पारीत गरि शिक्षा ऐन सदनमा पेश गर्ने निर्णय गरेपछि उक्त ऐन शिक्षा र शिक्षकको हकहित विपरीत रहेको भन्दै धर्ना कार्यक्रम सुरु गरिएको महासंघले जनाएको छ ।

उक्त धर्ना कार्यक्रम समापनपछि ३० बुँदे र ५१ बुँदे सहमति पत्र सहित ज्ञापन पत्र पालिकाका प्रमुख प्रशासकीय अधिकृतलाई बुझाईएको नेपाल शिक्षक महासंघका केन्द्रिय सदस्य तथा अखिल नेपाल शिक्षक महासंघका केन्द्रिय महासचिव चक्रपाणी पौडेलले जानकारी दिए । उनका अनुसार प्यूठान जिल्लामा पनि सबै ९ वटै स्थानीय तहहरुमा धर्ना कार्यक्रम गरि सहमति पत्र सहित ज्ञापन पत्र बुझाईएको छ ।

त्यस्तै आन्दोलनका कार्यक्रम अन्तर्गत ३० गते मंगलबार जिल्ला शिक्षा तथा समन्वय इकाईमा धर्ना, ३२ गते सामाजिक विकास मन्त्रालयमा धर्ना, भदौ १ गते जिल्ला स्थित प्रदेश तथा सांसदलाई जानकारी तथा पक्षीकरण गर्ने र सोही दिन केन्द्रिय स्तरका राजनीतिक नेतृत्वलाई जानकारी तथा पक्षीकरण गर्ने कार्यक्रम तय गरेको महासंघले जनाएको छ ।