स्वर्गद्धारी बहुमुखी क्याम्पसको १२औं क्याम्पस सभा शनिबार सम्पन्न भएको छ । सभामा सम्बोधन गर्ने बक्ताहरुले क्याम्पसको समग्र सुधारको लागि सबै पक्षको सहयोगको आवश्यकता रहेको औल्याएका छन् । कार्यक्रममा प्रमुख अतिथिको रुपमा रहेका लुम्बिनी प्रदेशका पूर्व मन्त्री तथा प्रदेश सांसद तुल्सीराम शर्माले सरकारले गरेका गल्तीलाई पनि तालि बजाए देश खतराको दिशामा जान सक्ने बताए । प्रदेश सरकारले शिक्षाको विषयमा ऐनकानुन बनाउने तयारीमा रहेको भन्दै सासंद शर्माले ऐनकानुन बनेपछि शिक्षाको समस्याको विषयमा प्रदेशमा घचघच्याउने बताए ।

यस्तै कार्यक्रममा लुम्बिनी प्रदेश सांसद धनलक्ष्मी श्रेष्ठले स्वर्गद्धारी बहुमुखी क्याम्पस जिल्लाका अन्य क्याम्पसहरुको अभिभावक भएको बताइन् । जिल्लामा सबैभन्दा पहिले स्थापना भएको स्वर्गद्धारी क्याम्पस भएकाले यो क्याम्पस जिल्लाका अन्य क्याम्पसको अभिभावकको भूमिका निर्वाहा गर्नुपर्ने बताइन् ।

क्याम्पस सञ्चालक समितीका अध्यक्ष तथा लुम्बिनी प्रदेशका पूर्व अर्थमन्त्री कृष्णध्वज खड्काले क्याम्पसलाई व्यवस्थित बनाउन समिति लागि परेको बताए । राम्रो कामको प्रसंशा र बिकृतिलाई सुझावको रुपमा लैजान सके क्याम्पसलाई सुधार गर्न सकिने खड्काले बताए । आरोपप्रत्यारोपले कहिल्यै सहि गन्तव्यमा पुग्न नसकिने खड्काको भनाई थियो ।

जिल्ला समन्वय समिति प्यूठानका प्रमुख धरम बहादुर जि.सीले जहिल्यै पनि समस्या मात्र औल्याउने प्रवृतिले समस्याको समाधान नहुने धारणा राखे । गुनासो मात्र नभई समस्या के कारणले हो भन्ने त्यसको बृस्तृत रुपमा छलफल गर्न आवश्यक रहेको बताए । क्याम्पस सञ्चालन गर्नको लागि त्यस सम्बन्धी छुट्टै कार्यविधि प्रदेश सरकारले बनाउन पर्ने जि.सी ले बताए । यसको लागि लुम्बिनी प्रदेशका सांसदहरुलाई भूमिका खेल्न आग्रह गरे ।