२०८० माघ ७प्यूठान नगरपालिकाभित्रको सुन्दर गाउँ खैरा दाखाक्वाडी जोड्न झिमरुक नदिमा पक्की पुल निर्माणको काम सुरुमा निर्माण कार्य थाल्दा स्थानीय निकै खुसी थिए । स्थानीयको बर्षौको मागपछि सडक डिभिजन कार्यालय प्यूठानमार्फत पुल निर्माणको काम २०७३ सालदेखि अघि बढेको थियो । पुलले खैरा गाउँ लाई जिल्लाको मुख्य सहायक राजमार्ग भालुबाङ–प्यूठान सडकसँग जोड्थ्यो । पुल बनेपछि नदिका कारण दुर्गम बनेको खैरा गाउँमा समृद्धि ल्याउने स्थानीयले आसा गरेका थिए । तर, पुल निर्माणको काम थालेको बर्षौ बितिसक्दासम्म पूरा भएको छैन् । अलपत्र अवस्थामा छ । काम कछुवा गतिमा भइरहेको छ । पुल अलपत्र पर्दा स्थानीयमा निराशा छाएको छ ।
‘पुल निर्माणको काम थाल्दा सुरुमा खैराबासी निकै हौसियौ,’स्थानीय सामाजिक अगुवा पार्वता आचार्यले भनिन,‘पुलले खैरा गाउँलाई सुगमतातिर उन्मुख गराउने आसा जगाएको थियो । अलपत्र पर्दा सबैमा निराशा छाएको छ ।’ जिल्लाको मुख्य बजार बिजुवारको नजिकैको गाउँ भएर पनि झिमरुक नदिपारीको गाउँ खैरा सधँै पछाडी परेको स्थानीयले गुनासो गर्दछन् । खैरालीहरु हिउँदको समयमा झिमरुक जलबिद्युत आयोजना बुटवल पावर कम्पनीले बनाएको ड्याम कचवयबाट गाडीमा वारपार गर्ने गर्छन ।
बर्खाको ठूलो भेलमा महिनौ गाडी चल्ने अवस्था हुँदैन । ‘बर्खाको समयमा स्थानीयले उत्पादन गरेको कृषिजन्य उत्पादन बजार पु¥याउन समस्या हुन्छ,’आचार्यले भनिन, ‘पुल बनेपछि धेरै राहत मिल्थ्यो ।’
हिजोआज खैराबासी दाखाक्वाडी पुग्न गाडीमा चेरनेटा भएर एक घन्टाको घुमाउरो बाटो हिड्छन् । पुल बने खैराबाट ८/१० मिनेट मै दाखाक्वाडी पुग्न सकिन्छ । पुल निर्माण सम्पन्न भए खैरा गाउँको रौनक नै फेरिने गैरसरकारी संस्था महासंघ प्यूठानका निवर्तमान अध्यक्ष तथा स्थानीय नेत्रमणी आचार्यले बताए । ‘सुन्दर गाउँ हुँदाहुँदै पनि यातायातको समस्याले खैराबाट धेरै जनाले गाउँ छाडे,’ उनले भने, ‘पुल निर्माणको काम थालिएपछि गाउँमा बसाईसराई गरेर जाने क्रम रोकिएको थियो । तर, फेरि निराशा बढेको छ ।’ खैरा–दाखाक्वाडी जोड्ने पक्की पुल निर्माणले प्यूठान नगरपालिका– १ को खैरा गाउँका स्थानीयले धेरै लाभ लिने प्यूठान नगरपालिकाका निवर्तमान मेयर अर्जुनकुमार कक्षपतिले बताए । ‘त्यही भएर पुल निर्माणको लागि धेरै पहल गरेका थियौ,’उनले भने । खैरामा डबल लेनको पुल निर्माण हुन थालेपछि यसैलाई आधार मानेर मदन भण्डारी राजमार्गलाई बाग्दुलाबाट खैरा हुँदै लैजाने प्रस्ताव तत्कालिन नगरसभामा गरेको कक्षपतिले बताए ।
खैरामा पाँच स्प्यानको डवल लेनको पुल निर्माण गर्न थालिएको छ । यो पुल निर्माणको लागि निर्माण कम्पनीसँग १४ करोड ५५ लाख ६३ हजार रुपैयाँ लागतमा ठेक्का सम्झौता भएको सडक डिभिजन कार्यालय प्यूठानले जनाएको छ । निर्माण कम्पनीलाई १२ करोड ७२ लाख ६३ हजार भुक्तानी भइसकेको सडक डिभिजन कार्यालय प्यूठानका लेखा अधिकृत झग बहादुर दसौतीले बताए । २०७७ बैशाख ३० गते निर्माण सम्पन्न गर्ने गरी पुल निर्माणको जिम्मा नागार्जुन कन्स्ट्रक्सनले लिएको थियो ।
हालसम्म पुलको भौतिक प्रगति ८२ प्रतिशत भएको सडक डिभिजन कार्यालय प्यूठानका प्रमुख राजिव श्रेष्ठले बताए । ‘निर्माण कम्पनीलाई पछिल्लो पटक थपिएको म्याद पनि सकिन थालेको छ,’ श्रेष्ठले भने, ‘हामीले ताकेता गरीरहेका छौ । निर्माण कम्पनीले तिब्र रुपमा काम गरेको छैन ।’
