प्यूठान
माण्डवी गाउँपालिका –२ धन्चौरका पहिरो पिडित बालबालिकालाई स्टेशनरी सामान हस्तान्तरण गरिएकाे छ ।

सामाजिक अभियन्ता अमृत खत्रीले स्टेशनरी सामान सहयोग गरेका हुन् । माण्डवी गाँउपालिका वडा नं.२ धन्चौरका अमृतले बुधबार आफ्नै गाँउको धन्चौरमा रहेको आधार प्राथमिक विद्यालयमा अध्ययन गर्ने बालबालिकालाई स्टेशनरी सामान प्रदान गरेका हुन् ।
धन्चौरमा गतवर्ष २०७९ असोज १८ देखि २२ गतेसम्म परेको अविरल वर्षाको कारण २२ गते राती धन्चौर गाँउ नै पहिरोमा बगेको थियो । उक्त पहिरोका कारण धन्चौर गाँउको झण्डै ४० घर परिवार विस्थापित भएका थिए। झण्डै विद्यार्थी विहिन बनेको विद्यालय खारेजको अवस्थामा रहेको आधार प्रा.वि धन्चौरमा अहिले १३ छात्रा र ९ छात्र गरी २२ जना बालबालिकाले अध्ययन गरिरहेको प्रधानाध्यापक रिता अधिकारीले जानकारी दिइन् । विद्यालयमा आफुसहित १ जना बाल बिकास सहयोगी र कार्यालय सहयोगी गरी ३ जना कर्मचारी रहेको प्रधानाध्यापक अधिकारीले बताइन । गतवर्षको पहिरो पछि झण्डै २ महिना विद्यालय बन्द हुने अवस्थामा पुगेको उनी बताउँछिन। उनी भन्छिन्–त्यतिबेला सिंगो गाँउ नै रित्तिएर सुन्यको स्थितिमा थियो । बिस्थापित परिवारका बिच निरन्तरको घरदैलो र भेटघाटपछि बिस्तारै बालबालिकाहरु विद्यालय आउन थालेको उनले बताइन ।
अमृतले भारतमा रहँदा कामको सिलसिलामा आफुले पाउने मासिक तलबको १० प्रतिशत रकमबाट त्यस विद्यालयमा सहयोग गर्ने यस अघि नै घोषणा गरिसकेका थिए ।