२०८० चैत २७प्यूठानमा युवाहरुले परिवर्तन सुरुवातका लागि म भन्ने अभियान संचालन गरेका छन् । जिल्ला अस्पताल प्यूठान परिसरमा ‘‘व्यवस्थित अस्पताल हाम्रो चासो , हाम्रो स्वास्थ्य हाम्रै गुनासो” भन्ने नाराका साथ प्यूठानका युवाहरु अस्पताल सुधारका लागि जागरुक भएका हुन् । जिल्ला अस्पताल प्यूठानमा म सुध्रिन्छु र सुधार्छु भन्ने धारणाका साथ अस्पतालमा भएका कामकाजको बारेमा गुनासो सुन्न युवाहरु लागि परेका हुन् । हरेक क्षेत्रमा जनगुनासो र काम काजमा ढिला सुस्ती हुन थालेपछि यो अभियानमा जोडिएको युवाहरुको भनाई छ ।
समृद्धिका लागि परिवर्तन, परिवर्तनका लागि सुरुवात, सुरुवातका लागि म भन्ने अभियान सुरुवात गरेको प्यूठान सरोकार समाजका संयोजक सुमन सुवेदीले बताए । जिल्ला अस्पताल परिसरमा के भइरहेको छ र के हुँदै छ भन्ने विषयका लागि ३ दिनसम्म विरामीको गुनासो, अस्पतालमा भएका समस्या, अस्पतालले दिने सेवा लगायतका विषयमा गुनासो टिपोटका लागि यो अभियानमा लागेको सुवेदीले बताए । यो अभियान हरेक क्षेत्रमा सञ्चालन गर्ने सुवेदीको भनाई छ ।
