प्यूठानको झिमरुक फाँटमा यतिवेला धानको बिउ राख्न किसानलाई भ्याइनभ्याइ छ । गहुँबाली भित्र्याइसकेपछि किसान धान रोप्ने तयारीमा जुटेका छन् । धान रोप्नको लागि किसानले खेत समेत जोताइसकेका छन् । यसपाली किसानले नयाँ धान लगाउने तयारीमा छन् । प्यूठान नगरपालिकाले यस बर्ष किसानका लागि बिउमा अनुदानको समेत व्यवस्था गरेको छ । अनुदान मार्फत किसानले राधा १२, राधा १४, सुख्खा ३, साबित्री, राम धान लगायतका धानको बिउ रोजेका छन् ।

हिजोआज राखेको बिउ जेठको अन्तिमसम्ममा किसानले रोपी सक्छन् । असोज कात्तिकमा धान भित्र्याउछन् । धानको बिउ फरक भएपनि लगाउने र फल्ने समय उही नै भएको प्यूठान नगरपालिकाका कृषि शाखाका नायब प्राविधिक सहायक सुशिल के.एमले बताए । उनका अनुसार पहिलेको धानमा किसानलाई रोगले सताएको र धान धेरै ढल्ने गरेकाले यो बर्ष किसानले बिउ फेरेका हुन् । नगरपालिकाले ५० प्रतिशत अनुदानमा उपलब्ध गराएको धान ४ सय ६५ बढि कृषकले पाएका छन् । प्यूठान नगरपालिकाले १० हजार ६ सय किलो धानको विउ खरिद गरी किसानलाई वितरण गरेको जनाएको छ ।

जिल्लामा ६ हजार ५ सय ७५ हेक्टर क्षेत्रफलमा धान खेति गरिन्छ । त्यसको झण्डै आधा क्षेत्रफलमा झिमरुक फाँटले ओगटेको छ । झिमरुक फाँटमा करिब २ हजार ८ सय २९ हेक्टर क्षेत्रफलमा धान लगाउँदै आएको प्रधानमन्त्री कृषि आधुनिकिकरण परियोजना कार्यान्वयन इकाई प्यूठानका प्रमुख चुमानसिंह गिरीले जानकारी दिए । गिरीका अनुसार एक बर्षमा जिल्लाभर ३० हजार २ सय ४५ मेट्रिक टन धान उत्पादन हुँदै आएको छ । झिमरुक फाँटमा मात्रै १४ हजार ३२ मेट्रिक टन उत्पादन हुने गर्दछ ।

पछिल्लो समय किसानले गाई भैसी पाल्न छोडेपछि पराल धेरै हुने धानको बिउ भन्दा उत्पादन बढि हुने जात रोज्न थालेका छन् । पहिले लगाउने राधा ७, ९ जस्ता धानबाट धानसँगै पराल पनि हुने गर्दथ्यो । अहिले धेरैजसो किसानले साबित्री धान लगाउन थालेको नगरपालिका कृषि शाखाले जानकारी दिएको छ ।

नगरपालिकाले ५० प्रतिशत अनुदानमा धानको बिउ दिएपछि नयाँ धानको बिउ राखिएको प्यूठान नगरपालिका ३ सापडाँडा की भक्ती नेपालीले बताईन् । यो विउ आफुले पहिलोपटक लगाउन थालेको उनले बताईन् ।

त्यस्तै उनी मात्र होइनन् प्यूठान नगरपालिका ४ टारीकी रमा नेपालीले पनि नयाँ धान नै लगाउने तयारी गरेकी छिन् । उनले पनि नगरपालिबाट नै बिउ लिएर नयाँ धान रोप्न लागेकी हुन् ।

नगरपालिकाले ५० प्रतिशत अनुदानमा धानको बिउ दिएकोमा किसान खुसी छन् ।