१७ औं गणतन्त्र दिवस प्यूठानमा विभिन्न कार्यक्रम गरी मनाईएको छ । दिवसको अवसरमा प्यूठानको खलंगामा भएको कार्यक्रममा बोल्ने वक्ताहरुले गणतन्त्र आएपनि जनताको समस्या जस्ताको त्यस्तै रहेको बताएका छन् ।

जनतालाई साँच्चीकै गणतन्त्र आएको अनुभव दिलाउनको लागि जनताको समस्यालाई समाधान गर्न तर्फ सबैको ध्यान जानुपर्ने कार्यक्रममा सहभागीहरुले धारणा राखेका थिए । साथै सरोकारवाला निकायले जनआन्दोलनबाट प्राप्त गरेको गणतन्त्रका सकारात्मक पक्षहरु समिक्षा गर्दै गणतन्त्रका उपलब्धीलाई संस्थागत गर्नुपर्नेमा जोड दिए ।

मंगलबार विहान जिल्ला प्रशासन कार्यालय, जिल्ला समन्वय समिति र मल्लरानी गाउँपालिकाको संयुक्त आयोजनामा गणतन्त्र दिवस मनाईएको हो । महेन्द्र माध्यमिक विद्यालयबाट सुरु भएको प्रभात फेरी जिल्ला समन्वय समितिमा पुगी कोणसभामा परिणत भएकाृ थियो ।

प्यूठानका प्रमुख जिल्ला अधिकारी नारायण प्रसाद अर्यालको अध्यक्षतामा भएको कार्यक्रममा प्रमुख अतिथि जिल्ला समन्वय समिति प्यूठानका प्रमुख धरम बहादुर जि.सी रहेका थिए ।

कार्यक्रममा सरकारी तथा गैरसरकारी कार्यालयका कार्यालय प्रमुख, विभिन्न राजनीतिक दलका प्रमुख तथा प्रतिनिधि, ३ वटै सुरक्षा निकायका प्रमुख, पत्रकार लगायतको सहभागिता थियो ।

प्युठान नगरपालिकाले पनि गणतन्त्र दिवसको अबसरमा सरसफाई सहित उत्कृष्ट शिक्षक तथा विभिन्न बिधामा प्रथम, द्वितीय एवं तृतीय स्थान प्राप्त गर्ने विद्यार्थीहरुलाई सम्मान तथा पुरस्कृत वितरण गरेको छ । जिल्लाका अन्य स्थानीय तहले पनि पालिकामा गणतन्त्र दिवसको अवसरमा विभिन्न कार्यक्रम गरी मनाएका छन् ।

त्यस्तै उद्योग बाणिज्य संघ प्यूठानले गणतन्त्र दिवसको अवसर पारेर जिल्ला अस्पताल बिजुवारलाई ह्वीलचियर प्रदान गरेको छ ।