२०८० सालको माध्यमिक शिक्षा परीक्षा (एसईई) को नतिजा आज सार्वजनिक भएको छ । प्यूठान जिल्लाबाट (एसईई) दिएका ३ हजार ७ सय ३५ जना विद्यार्थीमध्ये ४ सय ४४ जना मात्र विद्यार्थी उत्तिर्ण भएको शिक्षा विकास तथा समन्वय इकाई प्यूठानका प्रमुख दुर्गा बहादुर खड्काले जानकारी दिए । उत्र्तिण भएकामध्ये ३० जनाले ए प्लस ग्रेड ल्याएका छन् । यो नतिजा अनुसार जिल्लामा १२ प्रतिशत मात्र विद्यार्थी उत्तिर्ण भएको खड्काको भनाई छ ।

सामुदायिक तर्फ ७३ र संस्थागतबाट ७ विद्यालय गरी ८० विद्यालबाट (एसईई) परिक्षामा विद्यार्थी सहभागि भएका थिए । शिक्षा विकास तथा समन्वय इकाईले अहिले बिस्तृत रुपमा पालिकागत र विद्यालयगतमा नतिजा प्रकाशन गर्ने जनाएको छ । कुन विद्यालय र पालिकाबाट कति विद्यार्थी पास भए भन्ने तथ्यांक निकाल्नको लागि ३ जनाले निरन्तर रुपमा नतिजाको काम गरिरहेको शिक्षा समन्वय प्रमुख खड्काको भनाई छ । साथै शुक्रबार सम्ममा पूर्ण रुपमा नतिजा प्रकाशन गर्ने तयारी समेत रहेको उनको भनाई छ ।