गत वर्षदेखि बाढीले प्रभावित गरेको मरन्ठानाको बुढदेवि वस्तिभन्दा माथि बायो–इन्जिनियरिङको काम सुरु हुँदैछ । उक्त काम सुरु भइरहेको सडक डिभिजन कार्यालय प्युठानका प्रमुख राजीव श्रेष्ठले बताए ।

बायो–इन्जिनियरिङ अन्तरगत वृक्षारोपण र बिरुवाजन्य संरचनाहरूबाट माटोको क्षयीकरण नियन्त्रण गरिन्छ । गत शनिवार सडक डिभिजनका प्राविधिकसहित त्यहाँको भौगोलिक संरचना र भू–बनोटको अवलोकन गरी बायो–इन्जिनियरिङको काम अगाडि बढाउन निर्देशन दिइएको प्रमुख जिल्ला अधिकारी नारायण प्रसाद अर्यालले बताए ।

“हामीले त्यहाँको भौगोलिक अवस्थाको अनुगमन गरेर बायो–इन्जिनियरिङको काम तत्काल अगाडि बढाउन भनेका छौँ ।” अर्यालले भने– “धेरै ठाउँको पानी जम्मा भएर एकै ठाउँमा ह्युमपाईप बाट जाँदा पनि जमिनको धेरै क्षयीकरण भएको देखियो । त्यसैले ति पाइप बन्द गरेर पानीलाई विकेन्द्रित हुन दिन भनेका छौँ ।”

बस्ती माथि जथाभाबी सडक खन्दा प्युठान नगरपालिका ९ र १० को सिमा क्षेत्रमा रहेको बुढदेवीमा बाढी पसेर क्षेति गरेको छ । श्रावण १० र १६ गते उक्त क्षेत्रमा बाढी पसेको थियो ।