सडक डिभिजन कार्यालय प्युठानले क्वाडि–बिजुवार–बाग्दुला सडक विस्तारको टेन्डर खुलाएको छ । प्युठान नगरपालिका १ क्वाडी स्थित बेलुवा खोलादेखि प्युठान नगरपालिका ८ बाग्दुलासम्म कालोपत्रे सडक विस्तारको लागि टेन्डर खुलाएको सडक डिभिजन प्युठानले जनाएको छ । प्युठान नगरपालिका १ स्थित बेलुवाखोला–बाग्दुला सडक खण्ड अन्तर्गत पर्ने मोटर बाटो यस आर्थिक वर्षमा ५ सय मिटर सडक विस्तार गर्ने गरी सडकले टेन्डर निकालेको हो । जस अन्तर्गत दायाँबायाँ गरी १५ मिटरको चौडा बनाउने, पर्खाल उठाउने, नाली बनाउने, ग्राभेल सहित कालोपत्रे गर्ने कार्यालयले जनाएको छ । नेपाल सरकारको वैकल्पिक सहायक राजमार्ग शीर्षक अन्तर्गत विनियोजित १ करोड बजेटमा उक्त काम गर्ने सडक डिभिजन कार्यालय प्युठानले जनाएको छ ।

सडक विस्तार गर्दा सडक वरिपरि रहेका घर टहराहरू हटाउनुपर्ने भएमा स्थानीय समुदाय, स्थानीय प्रशासन र प्युठान  नगरपालिकासँग समन्वय गरिने सडक डिभिजन कार्यालय प्युठानका प्रमुख राजीव श्रेष्ठले बताए । सडक साँघुरो  खाल्डाखुल्डी भएकाले यात्रामा असहज भएको अवस्थामा सडक चौडा र कालोपत्रे गर्ने योजना बनेको श्रेष्ठले बताए । यसपछि  यात्रामा थप सहज हुने आशा गरिएको छ । सडक विस्तारको कामले बर्सेनि भइरहने दुर्घटनालाई समेत कम गर्नमा सहयोग पुग्ने सडक डिभिजन कार्यालयले विश्वास लिएको छ । क्वाडी– बिजुवार– बाग्दुला सडक विस्तार गर्ने काम सडक डिभिजन कार्यालयले गर्न थालेको बताउँदै प्युठान नगरपालिकाले सहजीकरण गर्ने प्युठान नगरपालिकाका मेयर विष्णु बहादुर योगीले बताए । “सडक विस्तार गर्ने सबैको साझा धारण छ”, मेयर योगीले भने -“त्यसले गर्दा बाटोलाई अवरोध नहुने गरी स्थानीयसँग  सहमति गरेर अघि बढ्छौ ।”

घर टहराहरू हटाउनुपर्ने सम्भावित स्थानमा सोही ठाउँका स्थानीयसँग त्यसबारे छलफल गर्ने तयारीमा नगरपालिका रहेको मेयर योगीले बताए । उनका अनुसार बेलुवा क्वाडी हुँदै बाग्दुलासम्मको बाटोमा धेरै चाँप, साँघुरो बाटो भएका कारण असुरक्षा भएको भन्दै सबैको एउटै निष्कर्ष भनेको बाटो विस्तार नै हो । यसको लागि नगरपालिकासँग सबैले हातेमालो गरेर अघि बढ्न आवश्यक रहेको मेयर योगीको भनाई छ ।

प्युठान नगरपालिकाका उपमेयर देवेन्द्र बर्माले सडक विस्तारको लागि हटाउनुपर्ने अस्थायी तथा स्थायी संरचनाको तथ्याङ्क यति नै हो भन्ने नगरपािलकास‌ग नभएको बताए । यस अघि नै नगरपालिका भित्रका स्थानीय, राजनीतिक दल, विभिन्न सरोकारवाला निकायसँग बाटो चौडाइ बनाउने विषयमा छलफल भएको बताए । यस अघि सडक विस्तार गर्न हुँदैन भन्दै आन्दोलन गरेका स्थानीयले अहिले बेलुवा–बाग्दुला बाटो विस्तार अन्तर्गत जुम्रीसम्म बाटो विस्तार गर्दा कुनै समस्या नहुने बताएका छन् । बाटो विस्तारको क्रममा क्षति भएमा सबैलाई क्षतिपूर्ति दिएको खण्डमा कुनै समस्या नहुने प्युठान नगरपालिका वडा नम्बर २ का स्थानीय मुक्ति पोख्रेलले बताए ।