गलत नियतका केही व्यक्ति सहकारी क्षेत्रमा प्रवेश गर्दा समग्र सहकारी क्षेत्र बदनाम हुनुपरेको नेपाल बचत तथा ऋण सहकारी सङ्घ ली.का वरिष्ठ उपाध्यक्ष दामोदर अधिकारीले बताएका छन् । गलत मान्छेहरूले सहकारीमार्फत चलाएको धन्दाका कारण सबै सहकारीमाथि आम जनमानसमा आशङ्का भएको अधिकारीले बताए ।

शनिवार बिजुवारको विजय फूलबारी साकोसको सभा हलमा प्रदेश बचत तथा ऋण सहकारी सङ्घ लिमिटेडले आयोजना गरेको साकोस सञ्जाल व्यवस्थापन अभिमुखीकरण कार्यक्रममा अधिकारीले धेरै सहकारीले अहिले पनि जनताका आधारभूत समस्या समाधान गर्न सहकार्य गरिरहेको दाबी गरे ।

प्युठान नगरपालिकाका नगर उपप्रमुख देवेन्द्र बर्माले सहकारीहरू सरकारले बनाएका नीति निर्माणको पूर्ण रूपमा कार्यान्वयन गर्न सके धेरै समस्या समाधान हुने बताए ।

प्युठान जिल्ला बचत तथा ऋण सहकारी संस्थाका अध्यक्ष भोज बहादुर बस्नेतले जिल्लाका सहकारीहरू केही राम्रा र केही झोलामा हुँदा समस्या भएको बताए ।