स्वर्गद्वारी गौमुखी यातायात प्रा.लि. ले प्युठानबाट काठमाण्डौ फर्कने यात्रुका लागि टिकट अग्रिम बुकिङ खुला गरेको छ। छठसम्म काठमाण्डौ जाने यात्रुलाई तोकिएको भाडादारमा २० प्रतिशत छुट सहित टिकट बुकिङ खुला गरिएको प्रा.लि. का अध्यक्ष चन्द्रमान श्रेष्ठले बताए।

दसैँमा काठमाण्डौबाट प्यूठान आउँदा अतिरिक्त गाडीहरूमा २० प्रतिशत बढी भाडा लिएको समितिले फर्कँदा सबै यात्रुलाई २० प्रतिशत छुट दिने भएको हो। आइतबार जिल्ला प्रशासन कार्यालय प्युठानमा बसेको सर्वपक्षीय बैठकले तोकिएकै दरमा सेवा दिनुपर्ने र बढी लिएको रकम फिर्ता गर्नुपर्ने निर्णय गरेको थियो। आउँदा अतिरिक्त शुल्क तिरेका यात्रुको रकम फर्कँदा छुट दिएर मिलान गर्न यातायात व्यवसायी कम्पनीले यस्तो निर्णय गरेको अध्यक्ष श्रेष्ठले बताए। सोमबार आयोजित पत्रकार भेटघाटमा श्रेष्ठले भने ‘दुई हजार यात्रुलाई लाइन लाएर रकम फिर्ता गर्नुभन्दा फर्कदा सोहि बराबर छुट दिएपछि हामिलाइ ब्यवस्थापनमा पनि सहज हुने र अन्य यात्रुलाई पनि फाईदा पुग्ने भएकाले यस्तो निर्णय गरेका हौँ । अनलाईन बुकिङमा अब फर्कने सबैले छुट पाउँनुहुन्छ ।’

सर्वपक्षीय बैठकको निर्णय अनुसार २० प्रतिशत महँगो शुल्क तिरेका २ हजार यात्रुलाई रकम फिर्ता गर्नुपर्ने भए पनि अब काठमाण्डौ फर्कने सबै यात्रुलाई २० प्रतिशत छुट दिइने उनले बताए। अतिरिक्त शुल्कमा टिकट काटेर प्यूठान आएका र छठसम्म काठमाण्डौ नफर्किने यात्रुको रकम छठपछि फिर्ता गरिने श्रेष्ठले बताए। श्रेष्ठका अनुसार स्वर्गद्वारी गाैमुखि यातायात प्रालि मार्फत दसैँमा प्यूठान आउन दुई हजार यात्रुले अतिरिक्त गाडीमा महँगो शुल्क तिरेर टिकट काटेका छन् भने, १ हजार ४० जनाले नियमित गाडीहरूमा तोकिएकै भाडादारमा टिकट काटेका छन्।

दशैपछि काठमाण्डौ जानेका लागि सोमवार रातिदेखि खुल्ला गरिने अग्रिम बुकिङमा असोज २७ देखि कार्तिक २२ गतेसम्मको टिकट छुटसहित काट्न सकिने प्रालि का प्रबन्धक कुमार श्रेष्ठले बताए। अनलाइनबाटै टिकट बुकिङ गर्न सकिने हुनाले काउन्टरसम्म पुग्न नपर्ने श्रेष्ठले बताए ।