प्रतिनिधि सभा सदस्य एवं सहकारी संस्था बचत रकम दुरुपयोग सम्बन्धमा संसदीय छानबिन विशेष समितिका सभापति सूर्य थापाले संसदीय समितिको इतिहासकै नयाँ मानक स्थापित भएको बताएका छन् ।

झुलेनी युनाईटेड नेटवर्कको विशेष संवाद कार्यक्रममा कुरा गर्दै थापाले संसदीय छानबिन विशेष समितिको अध्ययन, अनुसन्धान र कार्यान्वयन प्रक्रियाले नयाँ मानक स्थापित गरेको बताए ।

संसदीय छानबिनको दायरा, मानक र अभ्यासको इतिहासलाई बदलेर नयाँ इतिहास स्थापित गर्ने गरी प्यूठानी जनताको प्रतिनिधिको रूपमा काम गर्ने अवसर प्राप्त भएको बताउँदै थापाले समितिको प्रतिवेदन कार्यान्वयनमा सत्तापक्ष र प्रतिपक्षका सबै दलहरू एक ठाउँमा रहेको बताए ।

प्यूठान जिल्लाको विकासको प्रसङ्गमा सोधिएको प्रश्नमा जवाफ दिँदै थापाले विभिन्न सडक सञ्जालहरूको स्तरोन्नति र विस्तारका विभिन्न काम भइरहेको र भालुवाङ्ग प्यूठान सडक खण्डको विस्तारलाई प्राथमिकता दिइएको बताए । यसअघि सम्बन्धित पूर्वाधार मन्त्री र अर्थमन्त्रीले प्रतिबद्धता बमोजिम काम नगरेको र पुनः अर्थमन्त्रीसँग भेट गरी भालुवाङ-प्यूठान सडक विस्तारमा आवश्यक पहल गर्ने उनले बताए ।