प्रतिनिधि सभा सदस्य सूर्य बहादुर थापा क्षेत्रीले आवश्यकताका आधारमा योजना छनोट गर्नुपर्ने बताएका छन् । स्थानीय तहले स्थानीय आवश्यकताका आधारमा प्राथमिकिकरण गरेर योजनाहरूको छनोट गर्नुपर्ने बताए ।

जिल्ला समन्वय समिति प्यूठानमा बिहीबार सातौँ जिल्ला सभाको उद्घाटन सत्रलाई सम्बोधन गर्दै सांसद थापाले योजना कार्यान्वयन पूर्व सम्बन्धित निकायले योजनाको डिपिआर गर्नुपर्ने बताए । बनेका डिपिआर समेत कपि पेस्ट हुँदा कार्यान्वयनमा समस्या देखिएको बताउँदै थापाले आवश्यकता र तथ्यका आधारमा अगाडि बढ्नुपर्ने धारणा राखे ।

जिल्ला समन्वय समितिले अनुगमन र समन्वयको पाटोलाई प्रभावकारी बनाउनुपर्ने थापाले बताए । सभाको उद्घाटन कार्यक्रममा प्रदेश सांसदहरू तुलसीराम शर्मा, निमा गिरी, राजनीतिक दलका प्रमुख तथा प्रतिनिधिहरू लगायतले शुभकामना मन्तव्य राखेका थिए । जिल्ला समन्वय समिति प्रमुख धरम बहादुर जिसीको अध्यक्षतामा भएको कार्यक्रममा उपप्रमुख दुर्गा रेग्मीले स्वागत मन्तव्य राखेकी थिइन ।