प्यूठानमा पौष ५ गतेदेखि जारी प्रथम भित्रिकोट प्यूठान महोत्सवको सञ्चालन अनुमति रद्द गरिएको छ । महोत्सव समापन हुनुभन्दा १ दिन अगावै मङ्गलवारदेखि लागु हुने गरी महोत्सवको अनुमति रद्द गरिएको छ । प्यूठान नगरपालिकाका नगर प्रमुख विष्णु बहादुर योगीले आयोजक संस्था प्यूठान उद्योग वाणिज्य सङ्घ प्यूठान नगर बजार क्षेत्रलाई पत्राचार गर्दै महोत्सव सञ्चालनको अनुमति रद्द गरिएको जानकारी गराएका छन् ।

जिउ धनको असुरक्षा, जनगुनासो र विभिन्न घटनालाई कारण देखाएर मेयर योगीले आयोजकलाई अनुमति रद्द गरेको जानकारी गराएका छन् । नगरपालिकाले पौष ५ देखि १७ गतेसम्म महोत्सव सञ्चालनका लागि अनुमति दिएको थियो । सञ्चालनको अनुमति पाइसकेपछि अनुमति रद्द भएको यो जिल्लाको पहिलो घटना हो । यसअघि महोत्सवको म्याद थप्ने अभ्यास भने भएको थियो ।

प्यूठान नगरपालिकाका मेयरले महोत्सव सञ्चालनको अनुमति रद्द गरेको पत्र पटाएसँगै आयोजक संस्था प्यूठान उद्योग वाणिज्य सङ्घ, प्यूठान नगर बजार क्षेत्र भने अन्योलमा छ । कुनै परामर्शबिना नगरपालिकाले सार्वजनिक गरेको पत्रले अन्योल बनाएको सचिव कमल पौडेलले बताए । ‘सबै तयारी छ के गर्ने अन्योल छ’, पौडेलले भने- ‘नगरपालिकाले सामान्य परामर्श पनि गरेन ।’